Paloma Uría y Carmen Ruiz Tilve, patrones de la Fundación Caveda y Nava

La Fundación Caveda y Nava va celebrar el día 6 de payares en Villaviciosa la II Xornada de la Fundación, na que va presentase un cartafueyu coles opiniones sobre la oficialidá d'asturianos relevantes, ente los que ta'l presidente del Real Uviéu, Manolo Lafuente.

El próximu día 6 de payares, el Monesteriu de Valdediós y la Casa la Cultura de Villaviciosa van acoyer la II Xornada de la Fundación Caveda y Nava, entidá qu'axunta a persones de les más estremaes posiciones y sensibilidaes na busca d'unos puntos mínimos de consensu sobre la llingua asturiana.

La xornada va dividise en dos partes, la primera a celebrar a les 5 de la tarde nel Monesteriu de Valdedios, onde la Fundación va nomar a dos patrones d'honor nes persones de Carmen Ruiz Tilve y Paloma Uría, la primera cronista oficial d'Uviéu y la segunda diputada d'Izquierda Xunida - bloque por Asturies na xunta Xeneral del Principáu. L'añu pasáu los patronos d'honor fueren l'ex - arzobispu d'Uviéu Gabino Díaz Merchán y el director del Muséu de Belles Artes Emilio Marcos Vallaure. Les escritores Berta Piñán y Carmen Gómez Ojea van ser les encargaes de lleer los discursos de presentación de les dos nueves patrones

Darréu, la xornada va treslladase a la Casa la Cultura de Villaviciosa, onde la oficialidá, palabra cásique totémica del movimientu de reivindicación llingüística, va ser la protagonista de los actos. Ello ye que d'una parte, l'especialista en lleis de la Universidá d'Alicante Josep Ochoa, que yá tuviere l'añu pasáu na primer xornada, va presentar un estudiu xurídicu sobre la oficialidá del asturianu. D'otra parte, la Fundación va presentar el cartafueyu "¿Qué ye la Oficialidá?" nel que dellos personaxes relevantes de la sociedá asturiana aporten los sos puntos de vista sobre lo que tendría de suponer la oficialización del asturianu. Ente los qu'apaecen nesta obra tan l'-ex Senador del Partíu Popular por Asturies Isidro Martínez Oblanca, el sociólogu director del EuskoBarómetro Francisco Llera Ramo, o el presidente del Real Uviéu de Fútbol, Manolo Lafuente.