Palacios torna a reclamar un debate na TPA ente candidatos que diz “nun interesar al PSOE, PP y IX”

Al igual que fixo na so presentación como candidatu de la coalición Bloque por Asturies-Unidá Nacionalista Asturiana (UNA) a la Xunta Xeneral, Rafael Palacios reclamó esti martes un debate na TPA cola presencia de PSOE, PP, Izquierda Xunida-Los Verdes d’Asturies (IX-LV) y la formación nacionalista. “Nun-yos interesa yá que tendríen que confrontar les sos propuestes coles nuestres”, aseguró.
 
“Estes tres fuercies polítiques saben que nun debate nun mediu públicu tán obligaos pola Xunta Eleutoral a que participemos nosotros y van intentar evitalo, por muncho que mareen la perdiz diciendo que nun lo descarten”, añadió Palacios. Na so opinión, pal PP lo más cenciello sería debatir col PSOE postulándose como l’alternativa única a la situación actual”, mentes qu’al PSOE y a IX-LV “nun-yos interesa de nenguna de les maneres que se confronte de forma pública les nueses propuestes y el nuesu análisis col suyu, yá que tienen mucho qu’esconder y quedaría n’evidencia que la opción única d’izquierdes que va a lluchar contra los recortes sociales y a enfrentase a los gobiernos estatal y européu, sían del signu que sían, ye la representada pol Bloque por Asturies-UNA”.
 
Amás, el candidatu de la coalición nacionalista señaló que “la propuesta d’izquierdes, asturianista y ecoloxista” que representa “ye una alternativa de votu real, que trae aire nuevo y que xenera ilusión ente un gran númberu de votantes desencantaos”. Pa finar, Palacios esixó al PSOE, PP y IX-LV “que tengan la valentía y la coherencia democrática de rectificar y acceder a entamar un debate pa que sían los ciudadanos y ciudadanes los que decidan”.