Palacios, San Miguel y otros cuatro activistes entamen una fuelga de fame na embaxada n’Atenes

|

La pasividá del Gobiernu estatal ante’l secuestru del ‘Gernika’ barcu que forma parte de la Flota de la Llibertá poles autoridaes griegues llevó a seis activistes a entamar una fuelga de fame. Rafa Palacios y Miguel San Miguel tán ente ellos.
 
Los otros cuatro cooperantes, zarraos na embaxada del Estáu n’Atenes xunto a los asturianos, son Elvira Souto, Antón Gómez Reino, Diego Cañamero y Mikel Zuloaga. Estes persones fixeron un comunicáu públicu nel que señalen que, al traviés del embaxador Miguel Fuertes, recibieron “una comunicación oficial del más alto nivel dende’l Ministeriu d’Asuntos Esteriores y Cooperación na que se nos anuncia la decisión de nun adquirir nengún compromisu públicu relativu a la lliberación del ‘Gernika’”. “A una petición tan básica, democrática y llegal como la de navegar de forma llibre col ‘Gernika’, barcu financiáu coles aportaciones de miles de ciudadanos y ciudadanes del Estáu español, el Ministeriu d’Asuntos Esteriores respuéndenos con una declaración autoritaria que revela la so falta de sensibilidá ante la defensa de los intereses de los ciudadanos y ciudadanes del Estáu español. Al mesmu tiempu, amuesa un interés nulu en solucionar la emerxencia humanitaria na que ta la población palestina na estratexa d’apoyu a lo más radical del sionismu”, continúen los seis activistes nel comunicáu, que punxeron como fecha d’entamu de la fuelga de fame esti llunes al meudía, aición que van facer na propia embaxada, onde permanecen dende’l martes, “hasta qu’esista un compromisu firme del Ministeriu d’Asuntos Esteriores de presionar al Gobiernu griegu pa la puesta en llibertá del ‘Gernika’”.
 
N’Asturies, a primer hora d’esta mañana, representantes de dellos coleutivos integraos na Coordinadora d’ONGD del Principáu d’Asturies tuvieron una reunión cola Procuradora Xeneral, María Antonia Fernández Felgueroso, pa solicita-y que “entame les xestiones necesaries pa la ‘lliberación’ del barco ‘Gernika’, perteneciente a la Flota de la Llibertá y inmovilizáu pol Gobiernu griegu de ‘manera illegal’”. Otra manera, el presidente d’Israel, Simón Peres, agradeció güei al so homólogu griegu, Carolos Papoulias, la so collaboración pa que los barcos d’ayuda humanitaria pa Gaza nun lleguen a Palestina. “Grecia sumóse al bandu antiterrorista y partidariu de la paz”, declaró Peres.

 

Contador Estadistiques