Palacios comprométese a defender el sector públicu y les polítiques sociales

Nun alcuentru con Justo Rodríguez Braga, secretariu xeneral d’UXT n’Asturies, Rafael Palacios se comprometió a defender el sector públicu y les polítiques sociales. El candidatu de Bloque-UNA fixo énfasis na educación y na sanidá.
 
Palacios, que tuvo acompañáu nel aconceyamientu con Rodríguez Braga por Fernando Ornosa, cabezaleru de la llista de la coalición nacionalista n’Uviéu, mostró la preocupación de Bloque por Asturies-Unidá Nacionalista Asturiana (UNA) pol “procesu de desmantelamientu de lo público” y espresó’l compromisu de la so formación en defensa de la “educación, la sanidá y les polítiques sociales”. “Va ser ún de los aspectos principales del nuesu trabayu, tanto na Xunta Xeneral como nos conceyos”, señaló. El candidatu tamién mostró la so preocupación poles cifres altes de paruu y pola salida de “miles de xóvenes” pa buscar trabayu fuera, ensin escaecer el papel de la muyer nel mercáu llaboral. “Ser muyer moza n’Asturies te lleva a una situación de precariedá”, afirmó.
 
Rodríguez Braga, pela so parte, mostró l’interés la Unión Xeneral de Trabayadores (UXT) na defensa de les polítiques sociales y de los “niveles de proteición”, faciendo énfasis nel “salariu social” como “pilar del Estáu de Derechu”. Tamién reclamó la defensa del “diálogu social” y de la “investigación, el desarrollu y la anovación”.