Palacios afirma que la so llista ye la del asturianismu porque “la mentira de FAC yá quedó desmontada”

El candidatu del Bloque-UNA-LV-GV, Rafael Palacios, considera que la so llista ye la del asturianismu porque “la mentira de Foro Asturias quedó desmontada”. Asegura que va esixir investigaciones polos sobrecostos n’obres públiques.
 
Nuna entrevista a Europa Press, el númberu 1 pela circunscripción central pola coalición nacionalista y verde recordó que "la mentira Foro Asturias yá quedó desmontada”, en referencia al caráuter asturianista supuestu d'esti partíu. "Nun demostró nengún compromisu con esti país. Presentóse como renovador y rexenerador, y demostró que yera un proyeutu personalista que fracasó de forma estrepitosa pola so incapacidá pa llegar a alcuerdos al tar enfadáu con tol mundu". Reconoz, nesti puntu, que'l partíu de Francisco Álvarez-Cascos arrampuñó votos al asturianismu na anterior cita eleutoral, pero agora confía en poder recuperalos. Amás, apunta que "el Partíu Asturianista nun se presenta" y que la coalición que representa incorpora pa esta ocasión a Los Verdes-Grupo Verde, "reforzando'l caráuter ecoloxista y la defensa del mediu ambiente".
 
Sicasí, reconoz que la convocatoria eleutoral "foi una mala noticia p'Asturies", "constatación del fracasu de les fuerces polítiques con representación". "Ye una desvergüenza que se vuelvan a repartir el pastel", opina. Dende'l so puntu de vista, "namás-yos interesa llograr el poder", en referencia a PP, PSOE, Foro y Izquierda Xunida.
 
No que respeuta a la deuda pública, Palacios afirma qu’ésta nun ye’l problema, sinón “en qué se gastó esi dineru y a quién benefició”. Asina, asegura que, en casu de llograr representación na Xunta Xeneral, va esixir investigaciones de los sobrecostos rexistraos nes grandes obres públiques. Na so opinión, los beneficiaos pola deuda foron "persones próximes a los partíos que tenemos ehí”, en rellación al Parllamentu. L'analís de caúna de les obres nes que se gastó'l dineru públicu ye una de les propuestes del programa de la so coalición nes que más incide. "Nun hubo", recuerda, "nenguna responsabilidá política por estos sobrecostos".
 
Pal que fuera direutor xeneral de l'Axencia Asturiana de Cooperación "la noticia del posible zarru d'un fornu d'Arcelor-Mittal demuestra que los partíos "nun defenden los intereses d'Asturies" porque "regalamos dineru a empresarios que s'aprovecharon d'ello y nun tienen nengún compromisu con esti país". Palacios calca en que la so llista ye la del asturianismu, la izquierda y l'ecoloxismu", y asegura que la so coalición encara la convocatoria con mires de llograr representación na Xunta Xeneral.
 
Refuerzu de los servicios públicos
 
El candidatu de Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) apuesta por un refuerzu "de los servicios sociales públicos, garantizando que puedan tomase decisiones polítiques mientres tolos asturianos tengan unos mínimos pa poder vivir y desarrollase". Ello ye que calca na propuesta de la so coalición d'encamentar a les Alministraciones a que nun apliquen la reforma llaboral aprobada pol Gobiernu.  
 
Apoya amás "una reforma estatutaria" que "dotaría a Asturies de los mecanismos y ferramientes más afayadices pa tomar midíes económiques y polítiques, como una carta de derechos sociales, la reforma del sistema fiscal, que plantegue disponer de los medios afayadizos, y la capacidá pa poder planiar la nuesa economía dende Asturies". Destaca tamién la importancia de "los sectores tradicionales abandonaos, como la ganadería, l'agricultura y la pesca, amás de l'agricultura ecolóxica, que pue ser ún de los ámbitos fundamentales de desarrollu". Asina, apoya "poner en valor la defensa de la tierra y el territoriu".
 
Sicasí tamién calca na necesidá de reforzar "la innovación y el desarrollu", porque tenemos xeneraciones de “xente mozo preparada que marcha a buscar trabayu a otros llugares". Tamién señala la necesidá d'una "llei de Función Pública" nueva pa garantizar la estabilidá a los trabayadores de l'Alministración, fuera de "amiguismos y clientelismos". "Nun vamos plantegar más recortes", reafirma, "nin más destrucción d'emplegu, nin más eliminación de lo público", y propón "una alternativa política y económica dende Asturies".