Paco Álvarez suma'l so tercer Xosé Caveda y Nava en cinco ediciones

|
Francisco 'Paco' Álvarez

El periodista xixonés ganó tamién la primera y la tercera d'esti concursu de rellatos curtios entamáu pol Conceyu de Villaviciosa.

Les escritores Marta Mori y Lourdes Álvarez y el filólogu Ángel Valle, xuráu del V Premiu de Relatos Curtios Xosé Caveda y Nava, decidieron por unanimidá que la obra merecedora del gallardón yera 'Les cenices de les últimes pallabres'. El so responsable resultó ser Francisco 'Paco' Álvarez, que llevara tamién la primer edición, del 2017, con 'Mar d'Irlanda', y la tercera, del 2019, con 'El faru de Viena'.

L'acta rescampla'l "trabayu de documentación histórica, la capacidá de suxerencia de la trama y la fluidez y habilidá nes técniques narratives". El cuentu trata sobre los últimos años de la dómina dorada de la piratería nel océanu Atlánticu.

L'escritor y periodista xixonés va recoyer la so recompensa, consistente en 1.000 euros y una mazana de plata conmemorativa, el 21 de febreru coincidiendo col Día Internacional de la Llingua Materna. Los otros dos ganadores d'esti concursu maliayu foron nel 2018 José Ángel Gayol con ‘Tolo que sé sobre toles coses’ y nel 2020 Xavi Cayado por 'A pie firme'.

Contador Estadistiques