Paco Álvarez repite como ganador del Concursu de Rellatos de Candamu

|
Francisco Paco Álvarez presentación 'Los xardinos de la lluna'

Per tercer añu siguíu, Francisco ‘Paco' Álvarez lleva’l Concursu de Rellatos Curtios Conceyu Candamu. Nesta ocasión foi col testu ‘Correr tres del vientu’, quedando en segunda posición José Ángel Gayol, mentes qu’en categoría infantil ganó Adriana Álvarez Suárez.

Trés de cincu. El periodista xixonés, con venceyu con Candamu por parte de pá, sigue col so idiliu col Concursu de Rellatos Curtios qu’entama la Conceyalía de Cultura dende hai un llustru y esti añu enganchó la so tercer victoria siguida.

Foi con ‘Correr tres del vientu’, la historia d'Adela, “una 'neña de la guerra' asturiana que vuelve nos años 50 naguando por una patria que nun la espera y que nun la quier”. Según rellata l’autor en redes sociales, “na estación marítima de Barcelona, la Policía Armada fiscaliza'l so pasaporte, escritu n'alfabetu cirílicu, mientres ella garra con brenga dos maletes nes que lleva una cámara fotográfica Zenit, un poco de ropa y un poemariu d'Olga Bergholz, la poeta soviética que recitaba versos en Radio Leningrado mientras les tropes de l'Alemaña nazi martirizaben una ciudá dispuesta a resistir hasta la última bala, hasta l'últimu aliendu, hasta l'últimu versu...”.

El segundu llugar foi pal testu ‘Lluvia’, de Gayol. Los dos esitosos escritores, ganadores de les estayes de novela y ensayu, de manera respeutiva, de los Premios Lliterarios 2019, reciben una recompensa de 500 y 200 euros.

Creáu nel añu 2016, la primer edición del Conceyu Candamu tuvo como vencedora a Yose Álvarez-Mesa con ‘Biliu Arbeyal', mentes que nel 2017 garró’l testigu Ana Esther Martínez Sierra con ‘El llagu de los cisnes’. Los dos años siguientes foi pa Álvarez con ‘La ponte’ y ‘L’home de la lluz y la tiniebla’.

Categoría infantil

Nel tramu d’edá que va de los 6 a los 11 años, el meyor rellatu resultó ser ‘La neña’, d'Adriana Álvarez Suárez, llevando’l segundu premiu ‘La neña que quería ser xana’, d’Alicia Menéndez Macías, rapacines que van recibir un llote de llibros como premiu. La estaya de 12 a 16 años quedó erma.

El xuráu d’esta edición del Concursu de Rellatos Curtios Conceyu Candamu, aconceyáu ayeri, tuvo formáu por Xosé Lluis Rodríguez Alberdi, Javier Calvo y Francisco Javier Fernández Conde.

Na semeya, Álvarez na presentación de la so obra 'Los xardinos de la lluna', ganadora del XL Premiu Xosefa Xovellanos de novela.

Contador Estadistiques