“Pa min lo más importante son les notes; el llibru tendría sentíu ensin les películes”, apunta Bande

|
Ramón Lluís Bande y Diego Llorente presentación 'Un tesoru y una tumba'

‘Un tesoru y una tumba’ ye’l tercer cuadernu de trabayu del cineasta Ramón Lluís Bande, obres que funcionen como “bocetos de les películes”, con reflexones que va faciendo l'escritor al traviés de cites d’otros autores. “Pa min lo más importante son les notes; el llibru tendría sentíu ensin les películes”, asegura’l xixonés.

La llibrería La Buena Letra acoyó’l miércoles pasáu la presentación d’esti títulu, que se centra na época na que rodó ‘Vaca mugiendo entre ruinas’ y ‘Contracampos’, que da continuidá a 'Un home que cava' (2019) y '¡Templu, cabaña!' (2021), editaos tamién por Impronta. Nella Bande tuvo un llargu diálogu con otru direutor, Diego Llorente, nel que se tocaron temes abondos sobre esti llibru y el procesu d’escritura del autor, y el so cine.

“El to llibru ye una busca de les tos razones, siempre intentando mirase nel espeyu de la razón, y p’alcontrar esa razón tuya a veces veste obligáu hasta a contestar con humildá a los tos mayestros”, señaló Llorente, que considera que “ye una vez más cargate de razones o pone-yos un nome y apellíos a les razones qu’a ti te lleven a acercate a la lliteratura, al cine, siempre dientro d’una busca global”.

Bande, qu’apuntó que “la cita ye la base de la mio escritura”, esplicó que “dende qu’alcontré un espaciu nel que toi a gustu na escritura, escribo más lleendo qu’escribiendo. Ye un trabayu que tien que ver muncho colo cinematográfico, de montaxe de testos, de montaxe d’idees, de poner en conflictu…”. Asina, rescampló que “hai dos maneres de xugar colos párrafos y los fragmentos, que ye en continuidá, que vayan construyendo voces, pero tamién en conflictu, y que de la rellación dialéctica que s’establez ente los párrafos surda una idea nueva. Y de toos esos fragmentos intentar dir construyendo pensamientos de dalguna manera”.

“Lo importante ye que yes el prisma que va filtrando les distintes voces que falen ente elles, voces mui dispares nel espaciu y el tiempu, pero qu’al final consigues que dialoguen”, siguió Llorente, que citó a Walter Benjamin como influencia. “La otra personalidá más importante nesti ciclu de películes y llibros xunto con Walter Benjamin sería Jean-Luc Godard, más como pensador que como cineasta, si se pudiera separtar”, añadió Bande al respeuto.

Llectura que llega depués de les obres cinematográfiques

El fechu de que la serie de llibros “siempre nos lleguen primero les películes” fai pa Llorente “mui prestoso dir reconstruyendo la to busca cuando yá conozo’l productu cinematográficu. Y préstame ver esa busca, esa vulnerabilidá y eses duldes y esos baxones, y les allegríes tamién cola revelación”.

Bande definió al respueto a los llibros “como bocetu de les películes”. “Pa min lo más importante son eses notes; ye onde yo voi tomando, enfadando conmigo mesmu… Y creo que los llibros tendríen sentíu ensin qu’esistieren les películes. Y les películes tienen sentíu, pal espectador sobre too, ensin conocer les interioridaes”, añade.

De los testos apuntó tamién que “la invitación a la reflexón ta más presente nos llibros, mui p’arriba de la emoción, que tamién ta, pero creo que la voluntá d’ensayar pensamientu enfría lo emocional”. Y completó afirmando que “lo bono que tienen les cites, y sobre too cuando tas construyendo la tentativa de pensamientu propiu al traviés d’eso, ye que deprendes a retorceles pa qu’acaben diciendo lo que tu quies anque n’orixe igual nun dixera eso. Busco coses que me discutan p’acabar convirtiéndoles no que pienso”.

La importancia del archivu de Constantino Suárez

Tamién hebo tiempu na presentación pa falar del archivu de Constantino Suárez nel Muséu del Pueblu d’Asturies, base de ‘Vaca mugiendo entre ruinas’, y la so importancia. “Ye una potencia. Por sí soles les semeyes nun son nada, si nun consigues activales de dalguna manera. La maraviya del archivu de Constantino, lo que lu fai cinematrográficu, ye que nel archivu tienes la foto que quixo facer y toes les que-y salieron mal antes de facer ésa. Y a min eso paezme mui cinematográficu”.

“Toi convencíu de que tol trabayu de Constantino Suárez pue pensase como un trabayu cinematográficu y la mio misión como cineasta ye contruyir eses películes. Tamién ye un trabayu de cita”, siguió Bande, qu’afirmó que “el trabayu creativu de Constantino Suárez demuestra de manera incuestionable qu’esistió n’Asturies un pasáu concretu que nos dixeron que nunca esistió, porque se borró de la historia. Al traviés del día a día de Constantino Suárez y acompañando eses imáxenes de los testos d’escritores y periodistes que vivieron esa época tamién, reconstrúyese tola historia d’Asturies qu’a min me paez imprescindible pa poder orientanos nel presente políticu, y más pa la construcción d’otros futuros posibles”.

Na semeya, Bande y Llorente dialoguen énte numberosu públicu.

Contador Estadistiques