Pérez-Espinosa diz qu’Álvarez-Cascos opónse a la reforma de la Constitución pa “ser diferente”

La vocera del PP, Isabel Pérez-Espinosa, señaló que Francisco Álvarez-Cascos mantién una postura contraria a la reforma de la Constitución pa “ser diferente”. Equipara’l so discursu al de partíos nacionalistes “catalanes y vascos”.
 
D’esta forma, Pérez-Espinosa retrucaba les declaraciones d’Álvarez-Cascos del sábadu nes que calificaba de “contraproducente” la reforma de la Constitución que quieren poner en marcha PSOE y PP pa fixar un techu de gastu. “Ye un contrasentíu ufrir al mundu financieru, como fórmula de recuperación de la confianza na economía española, un testimoniu tan evidente de desconfianza mutua ente los llíderes de los partíos mayoritarios”, aseguró, pa depués señalar que lo que l’Estáu necesita son unos pautos nuevos pa toos, con independencia de los resultaos de les eleiciones de payares, asemeyaos a los Pautos de La Moncloa. Al respeuto, la vocera del PP esplicó que los Pautos de La Moncloa firmáronse cuando tovía nun taba aprobada la Constitución y insistió en que la intención d’Álvarez-Cascos ye “diferenciarse” ante les eleiciones, anque lo faiga “renegando de los sos principios”.
 
La popular defendió la reforma señalando qu’ésta va permitir que les alministraciones públiques faigan coincidir ingresos y gastos. “Nun podemos gastar más de lo qu’ ingresamos”, comentó, invocando el principiu de “disciplina presupuestaria”. Amás, recordó que “otros países europeos” recueyen esi techu de gastu nes sos constituciones y qu’Álvarez-Cascos formaba parte del Gobiernu de José María Aznar qu’aprobó la lley del ‘déficit cero’ que, na so opinión, ye una medida similar. “Nun entendemos por qué camudó d’opinión”, apuntó Pérez-Espinosa, que cree que’l presidente d’Asturies pretende “diferenciase” con un discursu “que ye’l mesmo que tamos sintiendo en partíos políticos nacionalistes, como los vascos y catalanes”.