“Oxalá este mandato sía posible un gran pacto pola conservación y el uso del asturiano y el eonaviego qu’abra paso á oficialidá”, señala Barbón

Cuideiru foi’l llugar escoyíu nesta ocasión pol presidente Adrián Barbón pa dar el so discursu de Fin d’Añu. Como ye vezu emplegó’l castellanu y tamién l’asturianu y el gallego-asturiano, llingua na qu’apuntó que “oxalá este mandato sía posible, por fin, despóis de máis de 40 anos d’andadura autonómica, un gran pacto pola conservación y el uso del asturiano y el eonaviego qu’abra paso á oficialidá”.

Nun videu grabáu dende’l puertu, cola icónica vista del pueblu detrás, y emitíu en Nuechivieya, el socialista dirixóse a les asturianes y asturianos pa tocar dalgunos temes d’actualidá y esponer los sos polítiques pal país depués de l’aprobación de los Presupuestos. El retu demográficu, el retornu d’emigrantes, los proyeutos industriales, la gratuidá del 0 a 3, la vivienda pública, el compromisu pa cola cultura, y la quita de deuda autonómica y la reforma del sistema de financiación estatal foron dellos asuntos que’l presidente nun quixo escaecer na so intervención.

Tampoco la cuestión llingüística, de la que trató nel cachu de discursu nel qu’emplegó’l gallego-asturiano. “Demostramos qu’a combinación d’atrevemento y aprecio á nosa cultura é un bon rumbo. Hemos a avanzar por ese camín con feitos tan relevantes como a segunda ampliación del museo de Bellas Artes, a conmemoración del milenario del mosteiro de Corniana, actuacióis novas na Universidá Llaboral ou, por suposto, a promoción das nosas llinguas. Oxalá este mandato sía posible, por fin, despóis de máis de 40 anos d’andadura autonómica, un gran pacto pola conservación y el uso del asturiano y el eonaviego qu’abra paso á oficialidá. A cultura, incluído el empuxe al actividá deportiva, nun é úa estancia máis d’este goberno, sinón que ta incrustada nel corazón mesmo del Executivo”, espresó.

Enantes, nesi mesmu idioma, apuntaba que “2024 ha a trer audacia y reformas. Hai cuatro anos atrevímonos cua transición ecolóxica. Un discurso agoreiro pronosticaba qu’íbamos acabar sin industria y sin empreo. Hoi temos máis xente con trabayo, menos en paro y úa suma d’inversióis inimaxinable condo decidimos apostar pola economía verde. Os contratos garantizaos na fábrica de Trubia fixeron máis forte a industria de defensa; os proyectos confirmaos n’Avilés, como Windar, y os que se xestionan nel Musel ou nas concas, por citar sólo dalgúas localizacióis, tan allumando outro paisaxe empresarial. Innovador, sostible, con un protagonismo crecente del talento y el desenvolvemento tecnolóxico”.

La importancia de contar con Presupuestos

L’asturianu emplególu pa falar de les cuentes. “Antayeri, la Xunta Xeneral aprobó’l presupuestu más altu de la historia: 6.348 millones que van asegurar la mayor inversión sanitaria por habitante de toa España, van ayudar a reducir les llistes d’espera, van apoyar a quien emprendan nel mediu rural, van aumentar la vivienda pública o van inyectar cuasi mil millones a l’actividá económica”, señaló.

“Doi estos exemplos”, siguó, “porque un presupuestu nun ye una distribución de númberos apolmonante nin namás una baza política. Esi proyectu traduzse en realidaes apalpables qu’afecten a la vida cotidiana. Na espansión de la vía fiscal asturiana con deducciones y ayudes nueves pa les clases medies y trabayadores. Na apertura de les primeres 31 escuelines autonómiques, la rede de 0 a 3, que va ser gratuita dafechu pa toles families dende setiembre”.

Y porque “pa eso val tener unes cuentes aprobaes. Pa que les escuelines seyan gratis, p’atender a les persones mayores y combatir la soledá non buscada. Pa facilitar que la nuestra mocedá, esa mocedá que sobresal nos índices de calidá educativa, pueda emancipase y entamar una vida autónoma con una oferta creciente de formación y emplegu”.

Tamién uso la llingua asturiana pa falar del retornu. “Esti añu nuevu vamos empezar tamién a aplicar polítiques que favorezan la vuelta. Yá atraemos persones d’otros países y otres comunidaes qu’atopen equí un territoriu que ye la cuenta pa vivir y trabayar. Son munches, munches más les que vienen que les que marchen. Pues vamos dar otru pasu p’alantre: si tiempu atrás fuimos una tierra d’emigrantes, vamos pasar a ser una Asturies de bienllegada al retornu, que va recibir colos brazos abiertos, recursos y asistencia a quien quieran volver. Va ser una de les ferramientes coles que vamos plantar cara al retu demográficu”, avanzó.

Modelu d’estáu

Barbón defendió nel so discursu un modelu d’estáu “único y plural a un mismo tiempo, identificado de pleno con la Constitución y los valores que la hicieron posible; no caben la insolidaridad ni la desigualdad. La opción de aplicar una quita de la deuda autonómica o la reforma del sistema de financiación que ahora se plantean tienen, por fuerza, que ser coherentes con esos principios. Con ese planteamiento, en cualquiera de esos debates no cabe más que un desenlace: que Asturias salga beneficiada”.

“Para cruzar esas metas queremos todas las manos, juntemos todas las manos. Las nuestras, las tuyas y las de quienes se apasionan en la tarea de construir la mejor Asturias. También, porque nunca las olvidamos, las de las personas que están fuera. Ahora pienso en ellas y adivino que al ver estas imágenes reconocerán esta villa y su Asturias del alma, con una punzada de nostalgia por no poder pasar estas fechas en su patria. Para ellas, para todas las que me escucháis, un deseo simple, rotundo y sincero: feliz año nuevo. Feliz 2024”, finó’l llavianés.