Ovidio Sánchez pide que s’imite l’exemplu valencianu na reforma estatutaria

Na Comunidá autónoma valenciana, PP y PSOE tan acabante de llegar a un alcuerdu pa facer conxuntamente la reforma del estatutu. La reforma pautada ente PP y PSOE en Valencia ye xenerosa enforma a la hora de reconocer competencies nueves y, amás d'afondar en materia llingüística nuna comunidá que tien yá llingua oficial, propón tamién el reconocimientu como nacionalidá histórica, la creación d'un Serviciu Tributariu Valencianu, disolución anticipada de les cortes valencianes o la creación d'un nuevu "Tribunal Superior de Xusticia de Valencia" too ello amás d'una disposición adicional que se conoz como la "Cláusula Camps" que faculta a la Generalitat Valenciana a acceder a cualquier otra competencia nueva que garren otres comunidaes autónomes.

Énte esti alcuerdu históricu ente PP y PSOE en Valencia, el líder del Partíu Popular d'Asturies, Ovidio sánchez declaró ayeri que l'alcuerdu ente socialistes y populares valencianos tenía que valir d'exemplu n'Asturies. El líder del PP asturianu dixo que lo meyor p'Asturies yera una reforma estatutaria pautada ente PP y el PSOE en cuantes qu'estos dos grupos son los que van alternase nes responsabilidaes de gobiernu. Según Ovidio "Asturies debe aspirar a esi alcuerdu". Sánchez, anque nun entró a valorar los conteníos de la reforma estaturia pautada en Valencia, congracióse porque los cambeos previstos en materies de fiscalidá y de xusticia en Valencia "son distintos dafechu a los que se planteguen dende otres esferes".