Ovidio Sánchez diz que’l la reforma l’estatutu nun ye pa discutir si Asturies ye nación

El Debate sobre l'estáu de l'autonomía asturiana na Xunta Xeneral tuvo un momentu intensu cola intervención del popular Ovidio Sánchez. Pela parte del únicu grupu opositor al gobiernu na presente llexislatura na cámara, el portavoz del Partíu Popular nun aforró descalificativos pa la xestión del executivu, al qu'acusó de llevar a Asturies "pel mal camín" y al que-y pidió en cuenta d'allabancies pa colo proyectos del Gobiernu Zapatero n'Asturies "belixerancia" contra les iniciatives gubernamentales que dañen los intereses d'Asturies, en referencia al proyectu d'estatutu d'autonomía catalán que pal líder popular va valtar la solidaridá interna nel estáu de la qu'Asturies ye beneficiaria.

Nuna intervención que'l Presidente Areces calificó dempués de "sicodrama" l'otru puntu fuerte del discursu d'Ovidio Sánchez basose n'engarrase con Areces nuna guerra de númberos sobre la economía asturiana. Entornando tolos argumentos previos d'Areces, Sánchez dixo qu'Asturies nun ye a aparara la perda demográfica, que crez perbaxo de la media estatal, que ye incapaz de xestionar los fondos mineros, de llegar a niveles decentes d'emplegu o de completar les tresferencies, ello mientres el cañu de les ayudes europees va secando adulces. Otramiente, Sánchez quitó-y pesu a la idea de los proyectos d'infraestructures qu'Areces diz que se-y deben a l'acción del gabinete Zapatero y que pal líder del PP han d'agradecese a la iniciativa del anterior executivu en gobiernu de la nación española.

De cualquier manera, Ovidio Sánchez sí ofreció una mano al PSOE en dalgo, y ello foi nel procesu de reforma del Estatutu d'Autonomía d'Asturies. El presidente del PP mostróse dispuestu a llevar alantre un consensu nesti procesu que pa Sánchez ye posible "dende la sensatez" y "si se ta colos pies llantaos en suelu y s'escueyen los socios adecuaos" poniendo Valencia por casu prácticu a imitar. Ovidio Sánchez declaró que'l debate de la reforma nun ha centrase en discutir si Asturies ha ser nación o non. Nes mesmes palabres d'Ovidio Sánchez "Nun debemos ser menos que naide, pero tampoco tenemos que ser más que naide".