Ovidio Sánchez acepta'l modelu d'estáu d'Areces

La segunda xornada del Debate d'Orientación Política na Xunta Xeneral centróse nun cruce d'acusaciones ente'l secretariu del PP con Fernando Lastra y Álvarez Areces y nel que'l nivel políticu del debate decayó enforma.

El presidente del PP asturianu y portavoz del grupu popular na Xunta Xeneral, Ovidio Sánchez, descalificó dafechu tol discursu d'Areces nel del Debate d'Orientación Política, anque aceptó'l modelu d'estáu que propón el Presidente asturianu y debatir conxuntamente "les reformes precises dientro del criteriu de solidaridá que manda la Constitución"

Dempués de dicir na sesión inaugural que'l discursu d'Areces yera "autista" Sánchez entornó na segunda sesión del debate l'argumentu d'apertura d'Areces y Noemí Martín, y si'l socialista y la portavoz d'IX celebraron el cambéu de signu políticu nel gobiernu d'España del 14 de marzu, Sánchez venceyó'l trunfu políticu de Zapatero a los atentaos terroristes de Madrid. Otru tanto fizo cola política industrial, acusando a Zapatero de plegase a les imposiciones de Bruseles nel tema del astilleru d'Izar "treslladándo-yos el problema a los sindicatos".

N'ausencia de Villa, Hunosa apaeció nel debate, con un cruce de declaraciones públiques históriques en que PP y PSOE s'acusaron de querer trancar Hunosa. Sánchez enseñó recortes de prensa nos que Felipe González-y ponía fecha al pieslle d'Hunosa y dende la parte socialista asoleyáronse declaraciones en que Josep Piqué facía otru tanto. Otru de los estoyos de prensa más escandalosos que sacó del caxón el líder popular foi ún en qu'Álvarez Areces, entovía alcalde de Xixón, dicía que diba oponese a la privatización de la CSI (antigua Ensidesa) una privatización qu'agora Areces considera "emblemática p'Asturies" dixo Ovidio Sánchez.

La cuestión del emplegu ocupó otru cachu grande de la intervención del PP. Ovidio Sánchez quixo llevar pal PP toles medayes que reclamare Areces pola recuperación del emplegu. Sánchez declaró que "La productividá ye de les empreses y dase poles condiciones económiques creaes por ocho años de Gobiernu del PP".

Na cuestión de les infraestructures, Sánchez acusó a Areces de nun ser a facer los proyectos de carreteres qu'Álvarez Cascos dexó preparaos, ello en medio de la polémica polos documentos que s'alcontraron na Delegación de Gobiernu y nos que Cascos aplaza inversiones en carreteres n'Asturies. Ovidio Sánchez quitó-y fierru a la cuestión diciendo qu'eso yera "lliteratura alministrativa" y el voceru del PSOE, Fernando Lastra, retrucó con una intervención sangrina na que dixo que "Nun sabía que se revisare'l catecismu del Padre Astete y que mentira se llamare "lliteratura alministrativa", porque ser, ye mentira ".

Ovidio Sánchez nun perdió ocasión pa mecer política turística con infraestructures nuna intervención en qu'enseñó a estremar ente "visitantes" y "turistes". Ello ye que, según esplicó Sánchez, el gobiernu del PP punxo bones carreteres n'Asturies peles qu'entren visitantes, que nun cuayen en turistes porque "Los visitantes vienen aprovechando les carreteres que fizo'l PP y marchen porque nun hai alternatives"

La TV autonómica apaeció nel discursu popular como otru elementu d'enfrentamientu. El líder del PP dixo que'l so partíu nun va participar nel nomamientu del conseyu d'alministración del Ente Públicu de Comunicación mientres nun se retire la tasa sobre la gasolina, argumentando que nun se puen gastar 60 millones d'euros nuna TV cuando Asturies tien 14 canales de TV locales, prensa y radio y nun hai perres pa financiar l'hospital central