Ovidio Sánchez diz que va privatizar la TV autonómica si llega al poder

El líder del Partíu Popular d'Asturies declaró ayeri n'Uviéu qu'en casu de ganar les elecciones autonómiques nel 2007, ún de los sos primeros oxetivos diba ser el d'acabar colos "chiringuitos socialistes" ente los qu'asitió la televisión autonómica, a la que'l PP lleva oponiéndose dende que s'anunciare la so creación. Sánchez declaró que, en casu de llegar al poder un gobiernu del so partíu encabezáu por elli, procederíase darréu a la privatización del Ente Públicu de Comunicación.

Otramiente, Ovidio Sánchez declaró'l so contentu pola decisión de nun presentase a la carrera por encabezar la candidatura de los populares a la presidencia d'Asturies del alcalde d'Uviéu Gabino de Lorenzo. Ovidio Sánchez deseó-y lo meyor a Gabino de Lorenzo na so campaña pa les municipales uvieines del 2007 y declaró que cuidaba que'l bon resultáu del rexidor carbayón na so ciudá diba ser el meyor encontu pal trunfu del PP n'Asturies l'añu qu'entra.


¿Crees qu'una candidatura encabezada por Ovidio Sánchez pue ser una alternativa de poder n'Asturies? Vota y opina en Conceyu Abiertu