Otru másimu del euru

Los mercaos bursátiles tan metíos nun rally de xubes que nun tien traza de frenar hasta l'añu qu'entra. La comunidá inversora dexó a un llau les duldes sobre los datos macroeconómicos y ta mirando de pesllar ún de los meyores exercicios de los últimos años. El dólar foi'l que tuvo'l peor resultáu ya que les males anuncies sobre les perspectives de la divisa norteamericana nun paren de tirar p'abaxo pel so valor.

Selmana de más a menos na bolsa madrilana. Al final de selmana los inversores pañaron beneficios dempués de que'l selectivu Ibex-35 algamare la cota sicolóxica de los 8.700 puntos. El volume de negociu foi de 1.575 millones d'euros. L'Ibex finó la selmana nos 8.739,20 puntos lo que supón una xuba selmanal del 1,31%. La selmana pasada foi la de los chicharros con Jazztel, Tafisa y Befesa moviendo una parte perimportante del so capital en bolsa. Ente les xubes tamién destacó Arcelor ,gracies a les bones perspectives del sector del aceru, xunta con Iberdrola, Indra y Enagás. Nel llau de les perdes foron Gamesa, Telefónica y BBVA los protagonistes.

El mercáu de divises sigue con una volatilidá grande. El dólar tuvo una permala selmana con abultaes perdes respective al yen y al euru. El casu ye que l'euru llegó a tocar los 1,33 dólares unidá, ensin dulda una cotización histórica dende qu'echare a andar nel añu 1999. Los bancos centrales de dellos países como China tan vendiendo bonos en dólares y mercando bonos en euros. Asinamesmo los inversores tan tamién invirtiendo parte de los sos activos en divisa europea colo que'l dólar va siguir baxando nes próximes selmanes. Nel mercáu de renta fixo los bonos norteamericanos tan en cayida llibre gracies a la debilidá del dólar mentanto que'l bund alemán a diez años sigue con una rentabilidá mínima del 3,75%.

Precios altos nel mercáu enerxéticu con un petroleu que ta entovía lloñe d'algamar cotes d'estabilidá. El barril Brent tuvo un pieslle perbaxo los 45 dólares anque nun ye arriesgao ver nueves xubes pola situación xeopolítica internacional d'anguaño. Mentanto les empreses ya tan soportando'l coste de la xuba del petroleu y dellos países ven peligrar el xorrecimientu económicu d'esti y del añu que vien. Otramiente, l'oru algamó los 452 dólares la onza, una valor ablucante y el más altu nos últimos dieciseyes años.