Otru gol de Cervero da-y una victoria pola mínima al Uviéu sobre’l Llangréu

Un fallu nuna salida de Gabriel permitió-y al Uviéu algamar la so quinta victoria consecutiva. Esti gol tamién ye'l 13 d'un Cervero que lleva una racha espectacular de xuegu, trabayu y efectividá cara a puerta. Rivas confirmó'l so apueste ofensivu que tan bonos resultaos ta dándo-y, xugando solo con tres defenses y el restu del equipu de marcáu calter ofensivu. Esti apueste nun tuvo reflexu nel xuegu d'ayeri, pero sí se vió la so efectividá, dándo-y otros tres puntos qu'averen inda más al equipu azul al títulu de Lliga. Foi un partíu tensu y aburríu pal públicu, mui poques foron les ocasiones de gol de les que disfrutaron dambos equipos siendo solo pa destacar dalgún tiru dende fora l'área y un remate de Darío que sacó Kili na mesma llinia de gol pela parte del Uviéu y dalguna llegada del Llangréu gracies a la velocidá de Xuanín y Peñil amás d'un cabezazu de Lekumberri al llargueru de Ponzo.


Na segunda metá vinieron les espulsiones, primero y de forma xusta les de los dos xugadores más "calentucos" de los dos equipos, Yeray y Rufi, pero dempués l'arbitru perdió los papeles y les tarxetes y semó tol campu de marielles y coloraes, nuna actuación penosa qu'amás s'agravó con dos clarísimos penaltis, ún en cada área y delantre les sos narices, que l'arbitru nun quixo pitar , esto foi de lo poco qu'animó'l partíu nel so tramu final.

Lo peor del partíu llegó nel minutu 76 cuando Darío se mancó nuna xugada na que sintió chascar la rodiella. El pichichi de la categoría tuvo que salir del campu en camilla y paez que la mancadura pue ser grave, anque hasta güei que se-y faigan los estudios nun se pue saber l'algame d'esta lesión, esperemos que quede nun sustu

Xornada 28 que pon al Uviéu más cerca'l títulu y a Mosconia y Ribesella (cola d'ayeri nueve victories siguíes) na lliguila d'ascensu, la cuarta plaza paez más cara y por ella lluchen Llangréu, l'Uni que nun pudo col Llanes en S. Gregorio, y Caudal, más retrasaos y con menos opciones queden un Llealtá que dio la sorpresa de la xornada al perder col Hispano en casa y Avilés. Pela parte baxa paez que la cosa ta clara p'Andés y S. Martín y tendrán que lluchar pa consiguir la salvación Navarro, Llanes, Industrial y Berrón, Titánico y Hispano sacaron ayeri tres puntos que-yos vien perbien pa escapar del descensu.