“Otres comunidaes llingüístiques ven con ilusión el procesu que se ta viviendo n’Asturies”, destaca González-Quevedo

Nissa acoyó esta fin de selmana’l ventenu quintu congresu d’ALCEM, nel que s’aprobó una moción na que se pide al Gobiernu la oficialidá del asturianu. “Otres comunidaes llingüístiques ven con ilusión el procesu que se ta viviendo n’Asturies”, destaca Roberto González-Quevedo, presidente del coleutivu del calter européu.

Tres la celebración nel 2015 n’Uesca del anterior congresu, l’Asocciation pour les Langues et Cultures Européennes Menacé (ALCEM) entamó na población occitana de fala provenzal esti aconceyamientu nuevu que tuvo llugar ente’l vienres y el domingu. Un total de doce llingües tuvieron presentes na cita, ente elles l’asturianu por mediu de González-Quevedo, qu’acudió como presidente d’ALCEM y como representante de l’Academia de la Llingua Asturiana pa informar sobre la situación del nuesu idioma.

El de Palacios del Sil presentó mociones rellatives a Asturies, en concreto sobre la oficialidá del asturianu y la creación de la especialidá docente, que tuvieron el preste de los miembros del coleutivu. Asina, ALCEM pide al Gobiernu la declaración d’oficialidá del asturianu, una vieya reclamación bien conocida n’Europa, polos munchos avances fechos al respeuto.

“Trátase d’una demanda de la sociedá que tien munchos años, l’ámbitu cultural ta implicáu cola llingua y esiste una correlación de fuercies nel Parllamentu que faen vidable la oficialidá”, destaca González-Quevedo, argumentos que llevaron a que la moción saliera alantre. “Too suma”, añade’l profesor universitariu, que valora de manera mui positiva’l desarrollu d’un congresu que tenía como títulu ‘Llingües y cultures minoritaries, ¿qué futuru va venir?’

Los avances últimos sobre la situación del asturianu tampoco nun pasaron desapercibíos pa los presentes en Nissa. “Les otres comunidaes llingüístiques con problemes ven con ilusión el procesu que se ta viviendo n’Asturies con respeuto a la oficialidá. Conocen bien cuála yera la nuesa situación y da-yos esperanza”, asegura’l presidente d’ALCEM, qu'estos díes tamién recibió'l títulu de Sociu d'Honor de Felibrige, asociación lliteraria pa protexer y cultivar l'occitanu, pola so trayeutoria de defensa de les llingües minorizaes.

Na semeya, dalgunos de los participantes nel congresu con González-Quevedo a la izquierda del atril. Semeya propiedá del Consello d'a Fabla Aragonesa.