Oseya pide amestar Sayambre a la Indicación Xeográfica del Quesu de los Beyos

El conceyu d'Oseya de Sayambre, perteneciente a Lleón , ta en trámites pa entrar na Indicación Xeográfica Protexida del Quesu de Los Beyos, que ta llevando alantre la Conseyería de Mediu Rural y Pesca asturiana.

Los Alcaldes de Ponga, Amieva y Oseya de Sayambre Manuel Antonio Yano, Ángel García y Antonio Jaime Mendoza, aconceyaron ayeri cola Directora Xeneral d'Agroalimentación Tomasa Arce p'abordar la posibilidá de trabayar en comuña pa llevar alantre la tramitación de la Indicación Xeográfica Protexida (IXP) del Quesu de los Beyos, colo que podríen beneficiase de la mesma los productores asturianos como los de la otra parte de la cordal.

La Dirección Xeneral d'Agroalimentación asturiana lleva yá dellos cuantos meses trabayando nesta IXP que pidieron los queseros de los conceyos de Ponga y d'Amieva, y anguaño ta trabayándose nel espediente qu'hai que mandá-y a la Unión Europea. Foi'l Conceyu de Sayambre'l que se mandó al Gobiernu asturianu pa pidir amestase a la iniciativa col oxetivu de que los queseros d'Oseya, que faen el mesmu productu, tamién puean etiquetar dientro de la IXP.

Por de pronto hai un alcuerdu políticu ente los trés alcaldes pa qu'ello sía posible, pero falta que los queseros asturianos dean el preste a la entrada de los sayambriegos, por ser una iniciativa particular. Otramiente, si s'almite la entrada de los d'Oseya, el proyectu va xestionalu directamente'l Ministeriu d'Agricultura, en cuantes que yá nun va depender d'una sola autonomía. Anguaño hai dientro de l'autonomía asturiana cuatro queseríes de Beyos que producen tolos años más de 50.000 kilos.