Ornia promete “especial atención pa la llingua” na TV autonómica

El Director del Ente Públicu de Comunicación d'Asturies compareció ayeri énte la comisión de control correspondiente del Parlamentu asturianu a petición del PP. Na so apaición pública, Ornia adelantó bien de detalles sobre la futura canal autonómica de TV, que va entamar a emitir en prebes el 8 de setiembre, día d'Asturies.

"Asturi4s TV " va ser a la fin el nome de la canal de TV, que va complementase cola entrada en serviciu de "Asturi4s Radio" y el portal d'internet "Asturi4s Info", según adelantó Pérez Ornia, que tamién espresó'l so compromisu de respetar el pluralismu políticu nes emisiones.

Pérez Ornia sorrayó muncho la contención económica de la Tv,que va nacer con una asignación presupuestaria de 15 millones d'euros. Según Ornia l'asturiana va ser "la TV más barata d'Europa" peritando'l so coste en 1,17 euros por ciudadanu y mes, garantizando amás l'equilibriu presupuestariu de la canal en cuantes que "nun va gastar nin un euru más de lo que s'ingrese". Con too y con ello, pal Director del ente lo importante ye que la TV va mandase por un criteriu de rentabilidá social más qu'económica tratando a los espectadores como ciudadanos y non como consumidores.

Ente los datos qu'aportó'l director sobre l'estáu actual del proyectu de la TV rescampla'l del del calandariu de la canal, que trabaya cola idea d'entamar les sos emisiones en prebes alredor del 8 de setiembre pa, nun plazu de trés meses, tar en condiciones de facer una programación normal que vaya enanchando horariu y conteníos hasta llegar nel 2007 a una emisión estable de cerca de 18 hores diaries que pueda recibise en tola xeografía asturiana. En cuantes a los conteníos, Ornia prometió un 50% de producción propio y unes cuatro hores diaries d'información más otres cinco d'espacios culturales, teniendo siempre a Asturies como "exe temáticu" de la programación y prestándo-y "especial atención a la llingua autóctona" anque nun quixo entrar a dar datos de porcentaxe d'usu de la mesma en cuantes que la parriya de programación nun ta definida entovía.

Otramiente, el director del Ente declaróse al favor del ingresu del mesmu na Federación d'Organismos de Radio y Televisión Autonómicos (FORTA) en cuantes que ye un órganu de representación d'intereses comunes y aporta beneficios económicos pa les televisiones de baxu presupuestu, pero aclarió que pel momentu nun se plantega entrar nel paquete d'emisiones de fútbol,que cuesta cerca de 3 millones d'euros.

Pérez Ornia apurrió tamiéndatos sobre la plantiya de la canal, que van formala unes 100 persones de les que trenta van ser periodistes. La empresa va da-yos formación a los sos profesionales pa que puean exercer indistintamente en cualquiera de los tres soportes del ente, televisión, radio y portal d'internet. Les prebes d'accesu van facese n'abril y la esbilla definitiva ente abril y mayu, entrando los trabayadores al puestu a lo llargo del branu.