Organizaciones ecoloxistes y culturales piden un compromisu institucional en defensa de los texos

Una convocatoria qu'axunta a la práctica totalidá de les organizaciones ecoloxistes asturianes y otres d'ámbitu cultural fai un llamáu a la participación nun Conceyu Abiertu que va tener llugar embaxo del texu d'Abamia en Corao, nel conceyu de Cangues d'Onís. La cita, que ye a les 12 del 1 d'Abril del 2007, plantéase como oxetivu'l llograr de les instituciones un mayor compromisu na protección de los texos del país, que denuncia que lleven una década d'ataques y estrozos.

Les organizaciones firmantes del manifiestu, ente les que s'alcuentren el Conceyu Etnográficu "Belenos", la Coordinadora Ecoloxista d'Asturies, Xeira o la Coordinadora Ornitoloxica d'Asturies d'ente un total de más de venti, afirmen qu'Asturies, con tener dellos de los meyores exemplos de texos d'Europa Occidental, nun atiende como debiere a estos árboles milenarios en munchos casos. L'abandonu de los texos que denuncien les organizaciones llega a situaciones como la del Sueve, onde se denuncia qu'existe una superpoblación d'herbívoros, erosión y falta de renuevu d'árboles. Casu más grave ye'l de dellos texos simbólicos asitiaos xunta ilesies o llugares especiales que sufren constantemente l'ataque de les obres que se faen na so contornada y que lleguen a secalos, como asocedió en Texos d'Allande o Uviéu.

Por ello, los grupos firmantes del manifiestu esixen que se declare la protección urxente de los texos silvestres,sobremanera los del Sueve, el desarrollu de tolos puntos del plan del texu y la ellaboración del catálogu xeneral de texos, too ello xunto con un control de les obres que puean afectalos.

Más sobre texos d'Asturies