Opónense a la tercer térmica n'Aboño

La Coordinadora Ecoloxista d'Asturies alvierte sobre'l riesgu que pue tener pal mediu ambiente la instalación d'un tercer grupu térmicu de producción eléctrica n'Aboño (Xixón), y oponse afechu a que la construyan. Pal colectivu ecoloxista, el plan de Hidroeléctrica de mangar un terecer grupu de carbón que, con 800 mw sedría'l más potente d'Asturies, nun tien asientu nun llugar como Aboño, que tien al llau una ciudá de 300.000 habitantes y onde yá s'alluguen otres dos centrales térmiques y una fábrica de cementos, instalaciones toes elles abondo dañibles pal mediu ambiente, ello ensin contar cola fábrica d'Arcelor, que ta en saliendo del valle d'Aboño.Nes alegaciones que presentó la Coordinadora al Ministeriu de Mediu Ambiente sobre esti proyectu, sorrayen dellos aspectos técnicos, como que'l proyectu no tien previsto da-yos tratamientu a los líquidos contaminaos que salgan de la planta nueva, lo que vien a agravar el problema de los grupos vieyos, que tampoco nun tienen depuradora, lo mesmo que nun queda claro como van almacenase y tratase la povisa y la escoria. Otramiente, el grupu nuevu obligaría a poner otra llinia d'alta tensión que nun fadría otro que meter más electromagnetismu a una zona que yá ta estragada d'ello.