OPA sobre Duro Felguera nuna selmana de xuba na bolsa

Selmana en positivo nos mercaos internacionales. La folixa y les vacaciones tan poniendo bien arriba tolos índices bursátiles preparando un bon pieslle nes bolses. La comunidá inversora ta reaxustando les carteres d'inversiones col oxetivu de menguar la factura fiscal. Xunta esto los analistes yá tan dando anuncies pal añu qu'entra, pal qu'albidren no económico como los efectos de la inestabilidá xeopolítico, l'altu preciu del petroleu o'l preocupante déficit de los Estaos Uníos.

La bayura d'estadístiques d'orixe americanu que vinieron esta selmana, toes elles positives, acompañáronse al otru llau del Atlánticu de datos más contradictorios, casu d'un PIB del Reinu Uníu del tercer trimestre que xubió un 0,5%. O un datu de confianza empresarial del mes d'avientu en Francia de 104 puntos, un puntu perbaxo les estimaciones.

Les fiestes de navidá en Wall Street vinieron bien cargaes de regalos de SantaClau spa los inversores. Los valores tecnolóxicos tan viviendo un resurdimientu importante dende la burbuya del 2000. Les OPV's de nueves empreses son otra vegada'l día a día de Wall Street lloñe de la crisis de los últimos años. L'índiz Dow Jones y el Nasdaq tuvieron el xueves pasáu pieslles mui positivos mentanto que'l vienres trancáron por festivu. Nel Vieyu Continente les xubes llegaron a tolos parqués siendo los sectores asegurador y químicu los más beneficiaos.

Seis selmanes de xuba asitiaron al Ibex-35 nos 9.054,20 puntos con una xuba nel conxuntu de la selmana del 2,1%. Con abultáu volume de negociu raspiando los 3.000 millones d'euros la Bolsa de Madrid ta viviendo ún de los meyores momentos nos últimos años. Les opes del últimu mes xunta la ganancia de los fondos de pensiones tan inflando la bolsa. De fechu los brokers ya dan anuncia d'una cayida de los mercaos nel primer trimestre del añu qu'entra a la par de que nun-ydan munchu más camín de xuba al parqué madrilanu nel 2005. Ente los valores con más xubes destaquen: Corporación Mapfre, SCH, BBVA, Iberdrola y Endesa. Nel terrén negativu foron Metrovacesa y Acciona los que más baxaron. L'anuncia de la selmana foi ensin dulda la OPA de la constructora gallega San José sobre Duro Felguera. L'únicu valor asturianu na Bolsa de Madrid vió esta selmana amenazada la so independencia pola ufierta de compra del 50% de la empresa pola filial industrial de la gallega San José. El conseyu d'alministración de Duro Felguera dio anuncia del rechazu de la OPA y dende'l Gobiernu d'Asturies y dende los sindicatos dixeron que nun-yos presta un res esta operación, pero Constructora San José nun dio síntomes d'abandonar a la primera l'asaltu a la compañía asturiana.

Tope históricu de la divisa europea que tocó los 1,35 unidaes. Anque los datos estadísticos d'Estaos Xuníos foron positivos los inversores continúen cola so apueste pol euru mentanto que la cayida llibre del dólar paez que nun tien igua. Les perspectives pal euru nel 2005 son de caltener esti camín de xubes hasta un posible máximu de 1,50 unidaes dólar. Los economistes yá dan anuncia de los peligros qu'esto lleva pa la economía de la Zona Euru. Otramiente, nos mercaos de renta fixo los bonos vieron medrar la so rentabilidá nuna selmana positiva. Asina, el bonu de referencia, el bund alemán a diez años, asitiose nuna rentabilidá del 3,61%. Finalmente, el petroleu tuvo una selmana tranquila con un barril Brent alrodiu los 40 dólares. L'oru sigue asitiao penriba los 400 dólares onza, un valor mui altu y ello que según los analistes el 2005 nun va ser tan positivu pal metal mariello.