Once mamíferos marinos quedaron avaraos no que va d'añu n'Asturies

|

Son dos foques, ocho toliñes y un moscote, de los que namái se pudieron salvar trés. Les actuaciones de la conseyería xeneren crítiques del CEPESMA y d'ecoloxistes.

La Direición Xeneral de Recursos Naturales atendió a estos animales y acudió al avisu de l'alcuentru de mamíferos en problemes de trés foques grises en Ribeseya, Gozón y Llanes, anque finalmente éstos pudieron volver al mar por sí mesmos. Les diez ocasiones nes que tuvo qu'intervenir foron les siguientes:

  • Foca gris alcontrada'l día 5 de xineru na sablera de San Antonio (Llanes) tres avisu d'un ciudadanu al 112 sobre les 13 hores d'esi día. Exemplar vivu con feríes aparentes en diverses partes del cuerpu y con mancadura nel güeyu izquierdu, recoyíu y treslladáu por personal de la Guardería del Mediu Natural al Acuariu de Xixón pal so tratamientu y depués a les instalaciones de la Direición Xeneral de Pesca en Castropol pa la so recuperación y posterior lliberación el 4 de febreru.
  • Foca gris recibida pol CEPESMA el día 22 de xineru nel puertu de Llastres y atendida ceo, tres avisu d'esta organización al 112 sobre les 9 hores del 23 de xineru, por personal de Recursos Naturales na sablera d'España (Villaviciosa) onde, según medios de comunicación, foi depositada pol mesmu CEPESMA la tarde-nueche del día 22. Exemplar vivu con problemes respiratorios aparentes bien graves recoyíu y treslladáu por personal de la Guardería del Mediu Natural al Acuariu de Xixón y muerta a la llegada a esta instalación. La necropsia del animal evidenció un colapsu pulmonar con encharcamientu por sangre nel 80 por cientu. Cadabre destináu a la coleición de la Direición Xeneral de Pesca.
  • Toliña común alcontrada'l día 29 de xineru na sablera de La Espasa (Caravia) tres avisu d'un ciudadanu al 112 sobre les 9.30 hores d'esi día. Exemplar muertu n'estáu inicial de descomposición, recoyíu por personal de la Guardería del Mediu Natural y treslladáu a PROYGRASA (Xixón) pa la so eliminación.
  • Toliña común alcontrada'l día 31 de xineru na sablera Celoriu (Llanes) tres avisu d'un ciudadanu al 112. Exemplar recién muertu ensin mancadures esternes aparentes, recoyíu por personal de la Guardería del Mediu Natural y treslladao a PROYGRASA (Xixón) pa eliminación. Tomaes muestres de dentición
  • Moscote alcontráu'l día 13 de febreru nun pedreru cerca de la sablera de La Vallina (Cuideiru) tres avisu d'un ciudadanu al 112 sobre les 14 hores d'esi día. Exemplar muertu n'estáu mediu de descomposición. Retirada imposible por allugamientu y pesu del exemplar. Tomaes muestres de dentición y texíos.
  • Toliña mular alcontrada'l día 15 de febreru na sablera de La Espasa (Caravia) tres avisu d'un ciudadanu al 112 sobre les 11 hores d'esi día. Exemplar muertu apocayá y en bon estáu esternu aparente, recoyíu por personal de la guardería del Mediu Natural y del Conceyu de Caravia, y treslladáu a PROYGRASA (Xixón) pa la so eliminación.
  • Toliña mular alcontrada'l día 15 de febreru na sablera de Espasa (Caravia) tres avisu d'un ciudadanu al 112 sobre les 11 hores d'esi día. Exemplar muertu apocayá y en bon estáu esternu aparente, recoyíu por personal de la guardería del Mediu Natural y del Conceyu de Caravia, y treslladáu a PROYGRASA (Xixón) pa la so eliminación.
  • Toliña llistada alcontrada'l día 15 de febreru na sablera d'El Rinconín (Xixón) tres avisu d'un ciudadanu al 112 sobre les 12:30 hores d'esi día. Exemplar muertu n'avanzáu estáu de descomposición recoyíu por personal de la Guardería del Mediu Natural y del Conceyu de Xixón (EMULSA) y treslladáu a PROYGRASA (Xixón) pal so tratamientu y eliminación. Toma de muestres de dentición
  • Toliña común alcontrada'l día 16 de febreru na sablera d'Outur (Valdés) tres avisu d'un ciudadanu al 112 sobre les 18.45 d'esi día. Exemplar recién muertu ensin mancadures esternes aparentes alcontráu por personal de la Guardería del Mediu Natural que foi alloñáu fora de la influencia de les marees pal so posterior treslláu a la mañana siguiente a PROYGRASA y toma de muestres. A la nueche nueche foi retiráu por personal desconocío, nun pudiendo ser alcontráu a otru día, confirmando personal del CEPESMA que fuera esa organización la responsable, depositándolu nes sos dependencies.
  • Toliña común alcontrada'l 28 de febreru na sablera de Xagó (Gozon) tres avisu d'un ciudadanu al 112 sobre les 13 hores d'esi día. Exemplar vivu ensin mancadures esternes aparentes recoyíu por personal de la Guardería del Mediu Natural y del Acuariu de Xixón, y treslladáu pa la so lliberación finalmente n'El Musel (Xixón) esi mesmu día sobre les 17 hore, tres un intentu fallíu na ría d'Avilés sobre les 15 hores.
  • Toliña mular alcontada'l día 29 de febreru na sablera de Xivares (Carreño) tres avisu d'un ciudadanu al 112 sobre les 9.45 hores d'esi día. Exemplar vivu en bon estáu aparente y ensin mancadures esternes, recoyíu y treslladáu por personal de la Guardería del Mediu Natural, del Acuariu de Xixón, del SEPRONA de la Guardia Civil y de la Dirección Xeneral de Pesca al puertu del Musel (Xixón) pa la so lliberación esi mesmu día a les 11.45 hores.

 

Trés exemplares muertos por mala actuación del Gobiernu

Les actuaciones de la Conseyería de Desenvolvimientu Rural y Recursos Naturales nes actuaciones con estos animales ta xenerando crítiques, tanto por parte de la Coordinadora para el Estudio y la Protección de las Especies Marinas (CEPESMA) como de la Coordinadora Ecoloxista d'Asturies. Dambos aseguren qu'al menos tres de les toliñes morrieron pola mala praxis por parte de los téunicos de la conseyería, dalgo que "torna a demostrar que fallen los protocolos d'actuación".

"Nun se pue permitir que n'Asturies dependamos de la bona voluntá de les persones y asociaciones qu'intenten iguar, dende la carencia de medios, esti abandono institucional coles sos obligaciones llegales cola fauna xabaz", afirmen los ecoloxistes.

Contador Estadistiques