Omar devuelve al UP Langreo a Segunda B

L'ascensu llangreanu permite al Avilés siguir una temporada más en Tercera División.

A la tercera foi la vencida. L'UP Langreo, que nos dos años anteriores viose frenáu pol Haro en segunda ronda y pol Almería B nel primer crucie, consiguió l'ascensu gracies a un tantu d'Omar nel minutu 63 que facía bonu'l gol nel 93 de Nacho Calvillo la selmana anterior n'Orihuela.

D'esta forma, Hernán Pérez, téunicu azulgrana dende'l descensu, consigue un más que merecíu ascensu a Segunda División B, categoría onde va haber otros dos conxuntos asturianos, los filiales del Sporting y Uviéu. Nin los gallegos del Alondras nin los rioxanos del Náxara pudieron col Unión nesti camín llargu y difícil pol ascensu nel que l'alicantín Orihuela foi'l rival caberu a superar.

Los casi 4.000 espectadores qu'acudieron a Ganzábal crearon una atmósfera mui favoratible pal conxuntu llocal. Sicasí, la primer parte de los asturianos nun foi bona por mor de lo muncho en xuegu.

Tres el descansu'l panorama cambió, más depués de que'l veterano Omar, un futbolista que conociera la Primera División cola camiseta del Sporting, recoyera un balón nel área pa rematar a gol. Los minutos últimos, como ye lóxicu, l'Orihuela apretó, pero los futbolistes llangreanos supieron controlar el partíu y caltener el 1-0 que da al equipu de la cuenca'l Nalón l'ascensu a Segunda División B pol valir doble de los goles fuera de casa (2-2 nel global).

Beneficiaos l'Avilés y el Turón

El saltu de categoría del Unión, sumáu al del Vetusta, permite la salvación de categoría del Avilés y del Turón, que se veíen arrastraos a preferente y primera, de manera respeutiva, pol descensu del Lealtad y el Caudal. Enantes el Siero y l'AD Ribadedeva beneficiáronse del ascensu del filial carbayón.