“Oficialidᔠuna asociación que quier facer visible’l conflictu llingüísticu

Esti miércoles día 16 de xunu va presentase n'Uviéu l'asociación "Oficialidá" una plataforma entamada por dellos empresarios y profesionales asturianos col oxetivu concretu de facer campañes y acciones concretes que valgan pa visibilizar el conflictu llingüísticu n'Asturies.

L'empresariu José Suárez Cachero, más conocíu por "Felechosa" el cantante de Nuberu, Chus Pedro, Quique Garamendi o Rogelio Álvarez Hevia son dellos promotores de la idega, que nun quier tapar nin facer de menos el llabor d'otres organizaciones de defensa y reivindicación de la llingua más tapar dellos furacos y carencies que los mentores de "Oficialidá" ven nel llabor en xeneral del movimientu asturianista en pro del idioma, centrando'l so llabor n'incidir sobre empreses de gran repercusión pública y determinaes arees de les instituciones públiques.

D'otra manera, Oficialidá quier ser un preséu col que les persones que quieran exercer el derechu a mandase del asturianu pa falar cola empresa y l'alministración tengan una cobertura llegal, apurriendo servicios xurídicos de baldre, too ello cola intención de que'l conflictu llingüísticu de faiga visible y real énte tola sociedá y dexe deser parte de la intrahistoria del país, anque siempres respetando escrupulósdamente les formes democrátiques.

Oficialidá va funcionar al traviés d'una páxina web que va ser el noyu dende'l que se centralicen toles actividaes, que van entamar con una campaña pa pidir la presencia del asturianu nos caxeros automáticos de Banco Herrero, marca p'Asturies del grupu Bancu Sabadell. Los socios d'Oficialidá, en representación d'un garapiellu curiosu de veceros de la entidá financiera, tienen previstes midíes de presión en casu de que Banco Herrero nun acepte les sos propuestes.

Anque va ser la primer vegada que se faiga una iniciativa d'esti estilu n'Asturies, Oficialidá tien referente estranxeros. Asina, el mesmu Arias Cachero da cuenta de la esistencia de plataformes asemeyaes no organizativo y funcional, anque non, evidentemente, nos oxetivos, nos Estaos Uníos, onde dende va tirmpu funciona, por poner un casu, la plataforma "Move On" venceyada al movimientu demócrata y qu'entama campañes concretes de defensa de los derechos civiles.

L'Asociación Oficialidá quier ser representativa de la sociedá civil asturiana y por ello ta abierta a la participación de más persones, ye más, ye preciso que tenga un bon númberu de socios pola cenciella razón de que tola financiación va tener que ser propio. Ello ye qu'Oficialidá tien puesto nos sos estatutos que nun va aceptar subvención pública nenguna mientres l'asturianu nun seya oficial Los detalles sobre la manera de facer efectiva esa participación van facese públicos el miércoles 16 a les 8 de la tarde nel Club Prensa Asturiana, onde amás va presentase en público tamién la web de l'asociación, www.oficialida.com (nun disponible pel momentu)