“‘Nunn’ ye una novela mui visual y cinematográfica”, rellata Martino

El Picu’l Castru, en Caravia, ye’l llugar onde se desendolca ‘Nunn’, llibru ambientáu en tiempos de la invasión romana. “Ye una novela mui visual y cinematográfica” esplica Xandru Martino, que depués de diez años de parón tien tamién terminada otra obra con fondu históricu, nesti casu sobre’l Reinu d’Asturies na época d'Alfonso II.

Nunn y Aiu, una pareya que vive con tranquilidá nel Picu’l Castru, son los protagonistes d’esta narración d’amor y compañerismu entitulada col nome d’ella. “Los primeros capítulos cuenten la vida nel pobláu” y la llegada de noticies “de que los romanos vienen emburriando” al sur del cordal, incoporando dellos personaxes a lo llargo de la trama, “dalgunos mui reconocibles”, como ye’l casu de cabezaleros de tribus ástures.

La documentación histórica xuega un papel importante en ‘Nunn’, amás de ser l’orixe de la propia idea. “Interésame enforma la historia d’Asturies, conocer más sobre ella. Los estudios reglaos sólo te cuenten la historia d’España y cuando tengo tiempu dedícome a ello. D’esta observación sobre esta época salió la novela”, esplica.

Tres diez años ensin escribir y depués de que los sos rellatos últimos “pidieran daqué más; más estensión”, Martino púnxose con esta historia que-y llevó otros diez años finala. “‘Nunn’ ye una novela mui visual y cinematográfica”, rellata’l rioseyanu sobre un llibru que ta teniendo un bon recibimientu ente los llectores y dando satisfaición a la editorial, Delallama, que s’estrena na lliteratura n’asturianu.

Ensin priesa por espublizar

‘Potestas’, de Xulio Arbesú, ye la obra que vien xeneralmente a la mente al falar de noveles históriques n’asturianu. Un xéneru pocu trabayáu al que se suma ‘Nunn’ y, a non muncho tardar, anque ensin priesa por espublizar dada la situación actual, un títulu ambientáu nel Reinu d’Asturies y centráu n’Alfonso II.

“Nació, al igual qu’esti llibru, d’un idea tres estudiar esta época de la nuesa historia”, recuerda Martino, que con respeuto al trabayu de documentación pa ‘Nunn’ apunta que la so mayor sopresa foi que “les fontes oficiales presenten munches duldes. Hai muncha diferencia de criterios dientro de los historiadores a la hora d’interpretar los datos. Nun se ponen d’alcuerdu, por exemplo, en coses básiques como ónde taben les tribus afitaes o la llende ente ástures o cántabros”.

El rigor históricu que buscó l’autor na novela vese hasta na cubierta del llibru, onde s’amuesa una fíbula de la época romana con forma de caballu atopada nel propiu Picu’l Castru –anguaño espuesta nel Muséu Arqueolóxicu–. El llar de Nunn y Aiu, una pareya d’ástures que nos permite viaxar a los primeros años del sielgu I de la nuesa era nun momentu clave de la nuesa historia.