Nun va haber xornada de Lliga en Primera y en Segunda División pola fuelga de futbolistes

La primer xornada de Lliga en Primera y Segunda División nun va celebrase poles discrepancies ente l’AFE y la LFP. El Sporting debía debutar en El Madrigal el sábadu y ye posible que xuegue un amistosu col Deportivo pa nun perder el ritmu.
 
L’Asociación de Futbolistas Españoles (AFE) mantién asina la fuelga pa les dos primeres xornaes de Lliga nes categoríes profesionales tres nun llegar a un alcuerdu na reunión d’esta mañana cola Liga de Fútbol Profesional (LFP). Pal vienres va celebrase otru aconceyamientu nel que pue haber un averamientu, pero nun habría tiempu pa los desplazamientos de los equipos, polo que se tomó la decisión de suspender esta primera xornada de Lliga. Según anunciaron representantes de los futbolistes, les distancies tovía son importantes. El Fondu de Garantía salarial sigue siendo’l puntu principal de discrepancia.
 
Sicasí, la fuelga de futbolistes pue venir bien a un Sporting cola enfermería enllena. Nacho Cases, Lora, Bilic, Iván Hernández, Ricardo y el xugador del filial Mendy tienen dellos problemes que-yos impiden entrenar y el retrasu del aniciu de la Lliga permitiría a Preciado recuperar a dalgunos d’estos xugadores. El téunicu roxiblanco deberá agora camudar la preparación y ye posible que los roxiblancos disputen un amistosu nestos díes, cola posibilidá d’enfrentase al Deportivo tres recibir el d’Astillero una petición de José Luis Oltra pa entamar un partíu de preparación.
 
Otra manera, el Sporting zarró ayeri la cesión del portugués André Castro per una temporada. El xugador del Porto viaxó per carretera a Xixón y esta mañana entrenóse a les órdenes de Preciado en Mareo. Con esti fichaxe, el cántabru yá tien a los seis centrocampistes que deseaba pa encararar la temporada y club xixonés va dar por peslláu’l capítulu de fichaxes pa esta campaña, cola posibilidá de la llegada d’un home de banda o un delanteru centru nel casu de qu’haya salides de futbolistes.