"Nun tenemos que mirar el coste de la oficialidá, sinón el coste de nun tener la oficialidá", apunta Alba

|
"Nun tenemos que mirar el coste de la oficialidá, sinón el coste de nun tener la oficialidá", apunta Alba

La Sala Constitución de la Xunta Xeneral acoyó la tercer sesión de les comparencies informatives de la Comisión Especial d’Estudiu sobre'l Réxime de Proteición y Promoción del Asturianu. Nesta ocasión participaron los profesores universitarios Isabel Hevia, José Alba, David Melendi, Pedro Suárez Rodríguez y Enrique del Teso.

La xornada desendolcóse cola ausencia de representantes de Ciudadanos y Foro, y cola baxa d’Eva García Vázquez, caderalga de Xenética de la Universidá d’Uviéu, que nun pudo acudir al recibir tarde la notificación de la comisión, polo que solicitó comparecer n’otra fecha. El papel del asturianu na Educación y la so presencia na universidá y nos campos nos que yeren especialistes los convidaos centraron les intervenciones y alderiques, anque les dos hores llargues de sesión dio p’afondar n’otres árees, siempre cola oficialidá de fondu.

Asina, Alba, profesor de Economía Aplicada de la Universidá d’Uviéu, destacó que “nun tenemos que mirar el coste de la oficialidá, sinón el coste de nun tener la oficialidá”, desendolcando esta idea más allá del aspeutu puramente económicu y centrándose tamién no social. Asina mesmo, recoyó la importancia del conceptu ‘lo nueso’, del que sintiera falar al Nobel de Lliteratura Seamus Heaney, persona defensora de les llingües minoritaries que tuvo un gran venceyu con Asturies.

La duración d’una llingua amenazada

El profesor de Llingüística Xeneral, Del Teso, destacó que “enantes una llingua amenazada podía durar munchos años. Agora esto nun pasa” y recordó que la media mundial de falantes d’una llingua “ta en 6.000”, refugando asina que se pudiera midir un idioma pol númeru de persones que lu empleguen. Hevia, profesora y presidenta de l'Asociación Asturiana de Pedagoxía defendió, pela so parte, el billingüismu por resultar beneficioso pal desarrollu de la capacidá de los escolinos y escolines, y señaló que “fai falta una pedagoxía cívica” pa dignificar l’emplegu del asturianu.

Melendi, profesor del Área d'Inxeniería Telemática nel Departamentu d'Informática de la Universidá d'Uviéu, utilizó la so intervención p’afondar sobre la creación de neoloxismos nel so campu, equiparando la capacidá del asturianu pa ello a otres llingües como'l francés o'l castellanu.

Ausencia nel Estatutu

Completó les intervenciones d’esta mañana, Suárez Rodríguez, profesor de Matemátiques de la Universidá d'Uviéu, que foi’l más críticu. Asina, cargó contra la burguesía asturiana, los dos partíos mayoritarios y la TPA, pa la que pidió un informativu en llingua asturiana, y dixo nun entender los motivos polos que la oficialidá quedara fuera del Estatu cuando ésti se creó. Tamién solicitó l’emplegu del idioma por parte de les autoridades n’actos como los Premios Princesa de Asturias.

Concha Masa, presidenta de la Comisión y representante d’Izquierda Xunida, y Andrés Fernández Vilanova ‘Ron’, de Podemos, llanzaron entrugues a los cinco profesores de la Universidá d’Uviéu y abrieron con ellos alderiques mui interesante sobre les variedaes dialeutales y sobre la necesidá de referentes na Alministración pa promover l’emplegu del idioma, ente otros munchos asuntos. Nin el PP nin la FSA-PSOE decidieron preguntar a los comparecientes.

Éstes foron dalgunes de les intervenciones destacaes de la xornada:

  • Hevia: "Fai falta una pedagoxía cívica por qu'haya respetu hacia l'asturianu" / "Lo que necesita la llingua ye prestixu na sociedá"
  • Alba: "Hai una necesidá importante de polítiques públiques n'asturianu" / "Tener apreciu pola llingua asturiana lleva a conocer tamién la nuesa historia" / "Nun tenemos que mirar el coste de la oficialidá, sinón el coste de nun tener la oficialidá"
  • Melendi: "La informática supón un retu pa una llingua como l'asturianu, pero non menor que pa otres llingües mayoritaries como'l francés" (sobre la creación de neoloxismos) / "Nun hai impedimentu pa usar l'asturianu n'ámbitos nuevos"
  • Suárez Rodríguez: "Un pueblu que pierde una llingua emprobez culturalmente" / "Tuvimos mala suerte cola burguesía asturiana, que siempre s'avergoñó del asturianu. Tamién colos partíos mayoritarios, a los que-yos importa un pitu”. / "El mensaxe subliminal que presenta la TPA ye brutal" (sobre l’emplegu del idioma que fai la canal pública) / “Pido a los diputaos que lluchen pola cooficialidá si nun queremos que desapaeza l'idioma. Si non, muerre en dos díes”
  • Del Teso: "Les llingües protéxense porque son un derechu d'aquellos que les falen" / "Si'l PP percibe que l'usu del asturianu como llingua vehicular va contra la llei, ye que la llei nun ta bien fecha"

Na cuenta de Twitter d’Asturies.com comentamos en direuto tola sesión. Calcando nesti enllaz pue consultar cómo se desendolcó la mesma minutu a minutu y conocer tolos comentarios de los comparecientes y representantes políticos.

Contador Estadistiques