“Nun tamos bien, la situación sigue siendo crítica, pero tamién ye verdá que tamos meyor”, espresa Barbón

|
Adrián Barbón y Pablo Ignacio Fernández Muñiz comparecencia Comité de Crisis COVID-19 23 de payares

La mengua de los contaxos na selmana última lleva al Gobiernu a permitir l’apertura del pequeñu comerciu, “de menos de 300 metros cuadraos”, y la torna de los productos non esenciales a los mercaos al aire llibre. Salú anunció cribaos en Xixón, Uviéu y Avilés.

“Nun tamos bien, la situación sigue siendo crítica, pero tamién ye verdá que tamos meyor respeuto a una selmana”, espresó'l presidente Adrián Barbón. Por esti motivu decídese suavizar les restricciones y permitir la reapertura del pequeñu comerciu, atrancáu dende'l día 4, a partir de mañana “con una normativa mui rigurosa de control d’aforos y del cumplimientu de tola normativa sanitaria” que se dará a conocer a lo llargo de día na resolución que se va espublizar nel BOPA.

Nel aconceyamientu del Comité de Crisis de la COVID-19 participaron per primer vegada los trés alcaldes de los conceyos en zarru perimetral dende’l sábadu, esto ye, Llaviana, Samartín del Rei Aurelio y Llangréu. Darréu tuvo llugar l’anuncia nuna intervención na que Barbón confirmó qu’Asturies nun va abrir pa la ponte d’avientu y na que quixo “pinchar el globu de cualquier falsu optimismu” sobre les navidaes, adelantando que van ser “diferentes dafechu a les d’años anteriores”, con menos familiares nes meses.

De 30 a 50 años

El Serviciu de Vixilancia Epidemiolóxica y la Direición Xeneral de Salú Pública fixeron un estudiu sobre les zones que se podíen beneficiar d’un cribáu adicional pa detectar o aisllar a les persones contaxaes en zones d’incidencia alta y ameyorar la deteición d’asintomáticos o presintomáticos en llugares nes que nun se facía’l mesmu esfuerciu de rastrexu. Tres esti trabayu, na cuenca’l Nalón entendióse que les franxes d’edá con mayor interés epidemiolóxicu en facelu yera de 40 a 60 años que convivan con mayores de 65 años, nun fixeran una PCR nel mes últimu y nun pasaran la COVID-19, y que nos conceyos próximos onde se va entamar, Xixón, Uviéu y Avilés, va centrase na que va de 30 a 50 años.

El conseyeru de Salú, Pablo Ignacio Fernández Muñiz, comunicó que les zones escoyíes son, n’Avilés, la que correspuende al códigu postal 33401, que vien a coincidir colos barrios d’El Quirinal y Sabugo; n’Uviéu, col 33011, qu’inclúi La Corredoria, Pumarín y Teatinos; y en Xixón, col 33209, qu’abarca zones d’El Llano, Roces, Ciares, Tremañes y Contrueces. “Con estes midíes los epidemiólogos creen que podemos llegar a ameyorar la capacidá de deteición”, apuntó.

Na imaxe, Barbón, con Fernández Muñiz difumináu en primer planu. Semeya obra d'Armando Álvarez.

Contador Estadistiques