"Nun sé cuál ye l'oxetivu final, pero nun ye serio", critica Piñán

La conseyera fixo referencia a la conferencia contra la oficialidá entamada pol PP con convidaos llegaos de Catalunya.

Berta Piñán, llueu de vese obligada a dar una lleición de llingüística a Pablo González, criticó al PP por trayer a Asturies “a opinar a cualquiera que nun sabe” sobre la realidá asturiana, en referencia al actu contra la oficialidá entamáu por esta formación el sábadu con políticos llegaos de Catalunya, ente ellos Alejandro Fernández, presidente del PP catalán. “Ye una falta de respetu pa cola xente d’equí, pa colos falantes, pa cola cultura asturiana, que cualquiera que vien de nun sé ónde venga a dicir lo que-y paez. Ye una opinión, mui respetable, pero nun ye más qu’una opinión. Son opinadores, nun son espertos”, criticó Piñán.

“Esto ye yá ofensivo. Qué risión diba producir se dalguien viniera equí a dicir ‘non, ye qu’a min, como nun me peta’l prerrománicu, porque a min lo que me gusta ye’l góticu, que ye lo que me prestó tola vida...', ustedes dexen cayer el prerrománicu. ¿Qué ye esto? ¿Qué situación tamos creando? O ‘claro, prerrománicos tamién hai munchos, cada edificiu prerrománicu ye diferente al siguiente'… Pero, ¿nun podemos facer una categorización o un estudiu final? Dende llueu, nun sé cuál ye l’oxetivu final, pero nun ye serio”, ironizó, visiblemente molesta, la conseyera de Cultura, Política Llingüística y Turismu.