“Nun insulte de manera soterrada a la ciudadanía qu’usa l’asturianu y tien derechos”, retruca Piñán a Leal

|
Pedro Leal edición n'asturianu y Cuadonga 2022

El diputáu Pedro Leal, espulsáu por Foro, aprovechó una entruga na Comisión de Cultura, Política Llingüística y Turismu sobre la efeméride de la nomada batalla de Cuadonga nel 2022 pa cargar contra les ayudes a la edición de llibros n’asturianu, llegando a falar de “nieros de manteníos”. “Nun insulte de manera soterrada a la ciudadanía qu’usa l’asturianu y tien derechos”, dixo-y Berta Piñán.

Na réplica a la respuesta de la cuestión trelladada a la conseyera, Leal saltó con que “la cultura nun se limita a la oficialidá o a repartir subvenciones pa espublizar ediciones n’asturianu, tampoco pa promover xardinos de la memoria histórica, sinón fomentar interés por tola nuesa historia y convertir esa cultura nuna palanca de desendolcu económicu y non nun club de subvencionaos”. Darréu llegó afirmar qu’esos llibros nun se lleen y que la so edición “nun ye crear cultura, ye crear nieros de manteníos”.

“Recomiendo-y que nun trivialice’l conceutu de cultura y sobre manera que nun menosprecie y amás insulte d’una manera soterrada a la ciudadanía qu’usa l’asturianu, qu’ama esta llingua, y que tien derechos, como tolos demás, d’usala y gociar d’ella”, treslladó-y, en castellanu, Piñán. Enantes, na primer respuesta a la entruga sobre planificación prevista nel presente exerciciu 2021 pa preparar la efeméride del añu viniente, la conseyera apuntó l’oxetivu del so departamentu de “desendolcar una programación cultural ambiciosa qu’implique a distintes instituciones y axentes culturales” na que ta trabayando “dende distintos ámbitos”.

Leal criticó que “tamos en mediu del añu 2021 y, vusté lo dixo, ‘va ser oxetu’ pero entá nun se fixo nada”. “Siguen cometiendo los mesmos errores que col triple aniversariu del añu 2018 y pue perdese otra vuelta una gran oportunidá de poner en valor el nuesu patrimoniu. Cuadonga 2022 ye la oportunidá irrepetible qu’Asturies necesita p’avanzar y abrir al mundu una historia de la que nos sentimos arguyosos y un paraísu natural acoyedor del que presumimos tolos asturianos”, llamentó.

Por último, la conseyera señaló "que, como bien diz, tamos nel añu presupuestariu 2021, non 2022", y ironizó con que nun hubiera quexes sobre les espublizaciones sobre los alcuentros científicos que tuvieron llugar nel 2018 que van espublizar el RIDEA y la propia conseyería. "Supongo qu'estes espublizaciones a vusté nun-y paecerán un marafundiu frente a otres que si-y paecen, polo que se ve", apuntó.

Na semeya superior, Leal sostién un llibru n'asturianu mientres critica les ayudes a la so edición. Na inferior, Piñán nel momentu de la so respuesta.

Contador Estadistiques