“Nun hai oficialidaes amables nin gafes nin repunantes, hai reconocimientu de derechos o nun lu hai”, recuerda la XDLA

Nes cais d’Uviéu tornaron a retumbar glayíos d’oficialidá, como asocede dende’l 1987 coincidiendo col Día de les Lletres Asturianes. La Xunta pola Defensa de la Llingua Asturiana (XDLA) demandó a la FSA-PSOE llevar l’alderique a la Xunta Xeneral pa “obligar a los demás a posicionase: o al llau de la sociedá o al llau de la intolerancia”.

Non sólo se cumplieron les predicciones y l’agua nun fixo apaición, sinón que’l sol acompañó los primeros pasos pela cai Uría de los manifestantes –más de 10.000 según la organización– convocaos pa reclamar la oficialidá del asturianu y del gallego-asturiano. Na cabecera, Xosé María García Sánchez 'Llábana' col banderón d’Asturies y les pandereteres, siguíes del baberu de la XDLA y les tradicionales lletres que formaben la pallabra ‘oficialidá’.

Per primer vez acudió la Federación Socialista Asturiana (FSA-PSOE) con pancarta –encabezada pol direutor xeneral d’Aición Cultural y Normalización Llingüística, Antón García, al que-y siguía la Conseyera de Cultura, Política Llingüística y Deporte, Ana Vanessa Gutiérrez– col lema ‘FSA-PSOE pola oficialidá’. Nun faltó la de ‘Reciella. Families pol Asturianu’, qu’animaba con música la marcha, asina como otres organizaciones.

Asina, acudieron a la manifestación con baberu la creada recién Asociación de Docentes d’Asturianu y Eonaviego, el Sindicatu Unitariu Autónomu de Trabayadores de la Enseñanza d’Asturies (SUATEA), Izquierda Sindical Asturiana, Comisiones Obreres (CC OO), Andecha Astur, Mazcaritos d’Uviéu, Red de la Clase Trabayadora, Aína, Podemos y Iniciativa pol Asturianu. Tamién pudieron vese banderes d’Izquierda Asturiana (IAS).

Mesmes demandes que va 30 años

Na Escandalera, onde finó la marcha, Leticia Baselgas y Pau Santiso encargáronse de lleer el manifestu de la XDLA, organización que tuvo tentada “de garrar un discursu d’hai diez, venti, trenta años, y aprovechalu pa güei ensin dicivos nada. Quitándo-yos dalgún detalle concretu que dexe saber de qué contestu históricu ye, quiciás nun dibeis notar la diferencia porque les demandes siguen siendo asemeyaes; tamién los argumentos: reivindicar lo de casa, reivindicar la igualdá con otres comunidaes, refugar la esclusión, denunciar la intolerancia”.

Y ye que son yá “trenta y siete años manifestándonos nestes feches de mayu. ¡Trenta y siete años! Un añu y otru, y otru, y otru... pa poner el ramu a la celebración de les Lletres Asturianes”. Pero “non, ¡nun nos damos y nun nos vamos dar!, aseguraron.

“Estes cais d’Uviéu, como les de Xixón, tienen visto pasar nos últimos años dalgunes de les manifestaciones más grandes de la historia contemporánea d’Asturies”, recordaron al tiempu que s’entrugaron “qué van facer los que dicen defender la oficialidá, qué ye lo que van facer yá, agora mesmo. Nun val con dicir tar a favor y nun facer nada, nun val con ser mui favorable y abrazar les cadarmes ultres nos medios, na escuela y na sociedá. Nun val. Queremos firmeza, coherencia na política llingüística”.

Porque “tamos falando d’eso: de dar derechos ciudadanos, d’enanchalos, non de recortalos”. Y al respueto, “yá lo diximos más veces y vais dexanos que nos repitamos: la igualdá de derechos nun tien que llevar detrás nengún axetivu. Nun hai oficialidaes amables nin oficialidaes gafes nin oficialidaes repunantes. Hai reconocimientu de derechos o nun lu hai. Nun queremos derechos de segunda. Queremos derechos, a cencielles”.

Mensaxe a la FSA-PSOE

“¿Qué va facer la nuesa clas política? ¿Qué van facer les nuestres representantes ehí, na Xunta Xeneral? ¿Qué va facer el PSOE? ¿Va dexar qu'Asturies siga careciendo un estatutu de segunda, del sieglu pasáu, y too por nun saber liderar la modernización que precisa? Esa modernización, ente otres coses, tien que poner fin a la discriminación del asturianu y del gallego-asturianu coles demás llingües del Estáu”, rescamplaron al tiempu que demandaron al partíu que lidera’l Gobiernu d’Asturies “impulsar un debate ehí, na Xunta Xeneral, pa que se pongan enriba la mesa los nuestros argumentos, pa obligar a los demás a posicionase, o al llau de la sociedá, de los sos derechos democráticos, de la xusticia..., o al llau de la intolerancia y la reacción llingüicida”.

Pa concluyir, apuntaron que “sabemos que somos más y que tenemos razón de sobra. Y sabemos que vamos ganar esta llucha. Nun nos damos”. Trés actuaciones musicales pondríen el ramu a la xornada, les d’Alicia Álvarez, Ún de Grao y Fruela 757.