Nuevu proyectu políticu n'Euskadi

La selmana pasada presentóse n'Euskadi Aralar, una nueva formación política, nacionalista y d'izquierdes, que quier remocicar l'enviciáu panorama políticu vascu dende una propuesta de rechazu al usu de la violencia, que considera un pilancu más qu'una ayuda nel camín de la reivindicación nacional. Ente les persones más visibles de la nueva organización, surdía d'una resquiebra dientro de la mayoritaria Batasuna, tan Patxi Zabaleta o Iñaki Aldekoa, y ente los militantes de prestixu figuren nomes históricos dientro del abertzalismu como'l de julen de Madariaga, fundador d'ETA y que dexare va tiempu toa actividá. Los sos presupuestos ideolóxicos y organigrama puen consultase yá nel web oficial del partíu.La llegada del nuevu partíu, que vien a competir pol mesmu espaciu políticu que Batasuna, nun ye bien vista dende dellos sectores de la tradicional formación abertzale, y dende llueu Aralar nun va tener un camín fácil d'andar p'asentase ente l'electoráu vascu. Anque Aralar ta contra la illegalización de Batasuna, el diariu Gara espublizó l'otru día una tribuna de Joseba Permach, miembru de la Mesa Nacional de Batasuna na que s'acusa a Aralar de facé-y el xuegu al PP nesti sentíu. Batasuna diz qu'Aralar nun aporta coses nueves y que namás vien a afondar gratuitamente la resquiebra del nacionalismu vascu.