Nuevu poemariu n'asturianu del valencianu Josep Carles Laínez

L'Academia de la Llingua Asturiana ta acabante espublizar, na so colección "Llibrería Académica", el poemariu Lenta lletanía del cuerpu nel hedreru del escritor Josep Carles Laínez. Con anterioridá, Laínez editó n'asturianu la obra de teatru Elsa metálico, qu'algamó'l "Premiu de Teatru" de l'ALLA, el llibru Caballinos del diañu, lluciérnagues y caparines, versión de diversos haikus xaponeses y abondes traducciones y rellatos. La so obra asturiana conoció, amás, tornes pal español y l'estoniu.

Lenta lletanía del cuerpu nel hedreru ye un llibru atípicu por mor de la igual importancia de los poemas, los anexos y les notes a pie de páxina introducíos pol autor. Escritu xunta Cynthia Surula (una poetisa llatina de fines del sieglu II), la obra recueye'l procesu de redacción de los testos y la vivencia alloquecida d'una rellación amorosa imposible. Nél, nárrase la esperiencia d'un contactu sobrenatural y los poemes que foron surdiendo nesta hestoria de velees y deseos.

Lenta lletanía del cuerpu nel hedreru ye tamién sobresaliente al facer usu de dos de les variedaes de la llingua asturiana (la occidental y la central) nos poemes. Nesti sen, Laínez declara tener "pretendío crear un diálogu onde la polifonía de les voces -la de Cynthia, la d'un hipotéticu interpelador y la de mio- s'adecuara a diversos dialectos del asturianu". Con esti primer poemariu en llingua asturiana, Laínez continúa peles siendes d'esploración temática sobre l'amor y la muerte qu'entamara cola pieza Elsa metálico.

Josep Carles Laínez (Valencia, 1970), ye llicenciáu en Filoloxía Valenciana y Española y tamién en Comunicación Audiovisual pola Universitat de València-Estudi General. Ente otros títulos tien espublizaos el poemariu Exotica Martyria (1991), la novela Alma (1997) y el llibru d'aforismos In Hoc Signo Vinces (1998). Nel terrén del ensayu ye de recién la so obra Construcción metafórica y análisis fílmico (2003). Nos Estaos Uníos tien espublizaos los volúmenes de poesía experimental Shipwreck (1999) y Archangel's Appeal (2000) mientres que como artista tien feches performances y instalaciones, como El naixement de la platja (2002). Comprometíu cola defensa de les llingües minoritaries, ye xefe de redacción de la revista Debats, columnista nel selmanariu n'asturianu Les Noticies y miembru de plenu derechu del Consello da Fabla Aragonesa.