Nuevu númberu de la revista lliteraria “Reciella Mallory"

Los miembros de la tertulia Reciella Malory van presentarán mañana sábadu 18 d'avientu la segunda entrega de la so iniciativa lliteraria. L'actu va facese na llibrería Alborá de Xixón a les 12.00 hores cola participación de los coordinadores y dellos de los escritores que collaboren nesti númberu.

La revista Reciella Malory - Cartafueyos de lliteratura asturiana edítase en L'Entregu (Samartín del Rei Aurelio) y ta coordinada por Ana Vanessa Gutiérrez, Chechu García y Henrique G. Facuriella. Nesti segundu númberu de la mesma collaboren los escritores Naciu Varillas,
Xurde Fernández, Pablo Antón Marín Estrada, Pablo Texón Castañón, Armando Vega, Inaciu Galán y González, Lourdes Álvarez, Casimiro Palacios y Xurde Álvarez.


Ente los testos espublizaos nesti númberu, que lleva l'ún en cuantes que la revista que s'asoleyó por primer vegada esti veranu llevaba'l díxitu "0'", alcuéntrase'l rellatu col que Naciu Varillas algamó esti añu el VII Concursu 'Cuentos pola oficialidá' del Conceyu de Bimenes. Los llectores alcontrarán tamién otru testu narrativu, poemes y la pieza teatral Con un trozu d'aliendu, de XurdeÁlvarez, ganador del concursu de testos teatrales de la Academia de la Llingua en 2003.

El númberu ceru de Reciella Malory saliere a la cai en xunu d'esti añu y taba formáu por testos de los miembros de la tertulia, que s'aconceya los vienres na cervecería Tom Malory de L'Entregu. Ente los integrantes del grupu cuéntentese, amás de los coordinadores de la revista, escritores como Xulio Arbesú, Roberto Corte, Juan Carlos Crespos Lanchas, Xurde Álvarez y Antonio y Guillermo Riopedre.