Nuevu llibru sobre mitoloxía pa la reciella

"Mitoloxía asturiana pa rapacinos y rapacines" ye'l títulu del llibru que va presentase'l próximu xueves 20 d'avientu na Llibrería Trabe, asitiada na cai Padre Buenaventura Paredes 4 d'Uviéu. El llibru, del que ye responsable l'asociación de cuentacuentos "Grupu Epona", va presentalu la so autora, Helena Trexu Fombella xunto con Mª Luz Pontón, reconocida escritora y mayestra amás de presentadora en dellos programes de RPA y Localia empobinaos al públicu infantil y collaboradora d'Asturies.com.

"Mitoloxía asturiana pa rapacinos y rapacines" ye un volume didáuticu y lúdicu de 61 páxines a tou color, alternando imaxenes con testos, desplicando los personaxes mitolóxicos asturianos. Al final del llibru alcuentrense varios exercicios pa xugar y deprender coles pallabres y nomes de los personaxes.
Esti llibru ye'l segundu na coleición infantil de Grupu Epona, Asociación de cuentacuentos que ya tien un gran volume de títulos nel mercáu asturianu dende poesía hasta relatos.