Nuevos tiempos n'Hidroeléctrica

Selmana importante pa la mayor compañía eléctrica asturiana. Hidrocantábrico celebra güei miércoles n'Uviéu una xunta xeneral d'accionistes na que va acabar d'asentase l'actual estructura accionarial de la empresa y na que tamién va tratase una tema tan trescendental pal futuru de la empresa (y tamién d'Asturies) como son les inversiones en nuevos grupos de producción Ná menos que 1.800 millones d'euros (300.000 millones de pesetes) tan enriba de la mesa.Nel planu empresarial, HC tendrá agora un periodu d'estabilidá cola presidencia por cuatro años de Manuel Menéndez, tamién presidente de Caxastur, anque lo más importante igual ye la la entrada nel conseyu d'alministración de Francisco Sánchez, presidente de la portuguesa EDP, nuevu sociu mayoritariu d'HC col 40%. Caxastur pierde representación, y los sos conseyeros sedrán, amás de Menéndez, Jaime Reinares, Mario Efrén, y Víctor Roza. Dende llueu, les xuntes xenerales d'HC yá nun volverán a ser como enantes, cuando toles families asturianes con apellíu importante se sentaben nun salón d'actos que recordaba'l Campoamor n'estrena de la temporada d'ópera.D'otra parte, HC aprovecha esti conseyu pa da-y propaganda a la so primer gran inversión n'Asturies dende que cambiare la estructura accionarial. La térmica nueva de ciclu combináu en Soto Ribera supón el primer gran apueste d'HC por esta tecnoloxía n'Asturies. La empresa diz que la nueva tecnoloxía ye menos contaminante (nel so web aseguren que ye "inocua") pero los 400 mw nuevos de potencia de Soto, que quemarán 363 millones de metros cúbicos de gas al añu, namás van compensase col pieslle del grupu más vieyu a carbón qu'hai en Soto, de 67mw de potencia.