Nueva derrota del Acesol Voley La Calzada

L'Acesol Voley La Calzada sumó una nueva derrota na so visita al Polideportivu Municipal "El Plantío" nel partíu escontra l´Universidad de Burgos pol resultáu de 3-0. L'alcuentru tuvo domináu siempres pol cuadru local, cuartu clasificáu de la Superlliga Femenina.

L´entamu del primer set foi igualáu con diferencies mínimes ente los equipos. Un parcial de 6-1 favoratible al Universidad de Burgos foi la primera escapada nel marcador, pasando dempués d´un 11-10 a un 17-10, gracies a dos bloqueos y al poder ofensivu de la cubana Enia Martínez.
La diferencia fízose más amplia hasta llegar a un 25-19, con un bloquéu de Irene Cano sobre Janesca Scharnovski. Esti primer set duró venti minutos.


El segundu set escomencipió con un erru na recepción de la xugadora local María Teresa Martín tres d´un saque de Bárbara Rodríguez, xuntándose que na siguiente aición hebo tamién un erru de Enia Martínez. Esto fizo que l´Acesol Voley s´adelantase nel tanteador con un 0-2. L´Universidad remontó esa diferencia gracies a tres aiciones seguíes d´Enia y Fabiana Berto, llogrando un 3-2. Dempués l´alcuentru tuvo mínimes ventayes locales d´hasta dos puntos con un 10-8.

Un erru nel saque de la xugadora fabril Daniela da Silva foi l´entamu d´un parcial favoratible al conxuntu burgalés de 5-0, pasando a un 15-8. Esta diferencia sofitóse nun remate d´Enia, un saque direutu de la brasileña Ana Paula Alves xunto a dos aiciones nel bloquéu d´Enia y Roseli Martins. Darréu l´Universidad conservó esa diferencia pa imponese por un 25-16.

El tercer set entamó con pequeñes ventayes pal Universidad, iguando`l marcador l´Acesol a 12 gracies al aciertu n´ataque de Vita Prychepa, que foi la meyor xugadora n´ataque y nel bloquéu pal conxuntu xixonés. Esa igualdá caltúvose hasta un 17-17, nesi momentu un demoledor parcial de 8-0 sentenció`l partíu con un 25-17. La duración del alcuentru nun pasó de la hora, en concretu 57 minutos. Nesti final destacó Roseli Martins que xunto colos erros del conxuntu xixonés peslló l'alcuentru.

Nel aspectu individual, la xugadora determinante foi la cubana del Universidad Enia Martínez, gracies al so aciertu nel remate, amás de ser la másima anotadora con dieciocho puntos; ella foi una velea pal conxuntu foriatu que nun foi quien a torgar el so xuegu ofensivu. Tamién hai de destacar a Roseli Martins nel bloquéu xunto con Ana Paula Alves.

Nel Acesol Voley destacar nuevamente a Vita Prychepa, que foi la cabezalera del equipu lo mesmo nel ataque (10 puntos) como nel bloquéu (5 puntos), xunto al trabayu fechu pola central ucraniana, destacar el papel desendolcáu por Bárbara Rodríguez.

Con esta derrota l´Acesol Voley La Calzada sigue asitiáu na posición cabera de la Superlliga Femenina, algamando namás qu'una victoria y tando a cuatro alcuentros de salvase. Nel alcuentru tuvo presente la peña Acesol con unos trenta aficionaos, qu´animaron al conxuntu
xixonés.


Alliniaciones:

Universidad de Burgos: Fabiana Berto, Ana Paula Alves, Enia Martínez, María Teresa Martín, Irene Cano y Roseli Martíns. Tamién xugaron: Elena Esteban (líberu) y Silvia Fernández.

Acesol Voley La Calzada: Mayerling Araujo, Vita Prychepa, Bárbara Rodríguez, Noelia Franco, Janesca Scharnovski y Daniela da Silva. Tamién xugaron: Noelia Sánchez (llíberu), Marija Zoric, Cristina Pardo y Estefanía Sangiao.