Nuberu actúa nel teatru de L’Entregu pa celebrar Santa Bárbola

Chus Pedro y Manolo Peñayos tornen a axuntase enriba nun escenariu pa celebrar la festividá de los mineros. Nuberu entama per tercer añu esti conciertu especial, que nesta ocasión va tener como sede’l Teatru Municipal de Samartín.

Los dos músicos asturianos pretenden asina nun dexar morrer la llama d’un de los grupos asturianos más significativos de la historia y, de pasu, celebrar Santa Bárbola y zarrar la programación que la fundación que lleva’l nome de la banda entamó a lo llargo de tol mes de payares baxo’l nome de ‘Los xueves de castilletes y carbón’. Asina, la Casa de los Alberti, en Ciañu, acoyó delles charres, ente les que destacó una conferencia d’Ana María Cano, presidenta de l’Academia de la Llingua Asturiana, o una recital poéticu cola participación de Chechu García, Manuel Asur, Pablo Texón, Lourdes Álvarez, Xurde Álvarez, Henrique Facuriella, Xosé Ramón Martín Ardines y Roberto Corte.

La intención de la banda ye que'l conciertu se convierta nuna tradición pa Santa Bárbola y qu’ésti tenga llugar en dellos puntos de la cuenca’l Nalón. La primer edición del mesmu celebróse na esplanada del pozu María Luisa, l’añu pasáu en La Felguera, y nesta ocasión acuéyelu L’Entregu. L’actuación va principiar a les 20 hores y la entrada al Teatru Municipal de Samartín del Rei Aurelio va ser la voluntá. Les perres van dir pal bote de resistencia de la Fundación Nuberu.