Noreña aprueba la ordenanza d’asturianu definitiva, “que garantiza los derechos de los asturfalantes”

|
Plenu de Noreña 25 d'abril ordenanza asturianu

Independientes por Noreña (IPÑ) y Foro sofitaron la ‘Ordenanza Municipal pal Usu de la Llingua Asturiana nel Conceyu de Noreña’ definitiva, presentada por Conceyu Abiertu por Noreña, “que garantiza los derechos de los asturfalantes”, apunta l’edil Pablo Pérez. IX astúvose, mentes que’l PSOE y el PP votaron en contra.

A pesar de que l’informe de Secretaría solicitáu por PP, PSOE y IX afitaba que’l Conceyu nun tenía competencia p’aprobar la ordenanza, l’equipu de gobiernu municipal nun s’echó atrás y finalmente la ciudadanía de Noreña va tener aseguráu’l so derechu a comunicase cola alministración na so llingua materna. La Llei d’Usu y Promoción del Bable/Asturianu y la garantía de la Direición Xeneral de Planificación Llingüística y Normalización de la so llegalidá llevó a IPÑ y a Foro a sofitar una normativa que venía apoyando dende que Conceyu Abiertu por Noreña presentara la posibilidá de desendolcala.

“La oficialidá ye l’únicu camín pa finar con toes estes problemátiques”, afirma Pérez, que valora de manera positiva “que los ciudadanos de Noreña puedan dirixe al so Conceyu n’asturianu, anque l’alministración nun quede obligada a responder nesi idioma”. Nesi sen recuerda que’l testu orixinal quedo reducíu tres l’anulación por parte del Tribunal Superior de Xusticia d’Asturies (TSXA) y una enmienda introducida nel propiu Plenu, caberu ordinariu de la llexislatura, p’asegurar que nun pudiera ser valtáu nos tribunales nel casu de denuncia.

Ésta ye posible que llegue si se cumplen les amenaces del PP nel Plenu. La conceyala popular y los 3 del PSOE foron los únicos que s’opunxeron a la ordenanza, anque nel casu socialista d’una manera non belixerante, poniendo como argumentu l’informe de Secretaría.

Esa mesma escusa emplegó Izquierda Xunida (IX), nel so casu p’astenese. Al final, la votación salió alantre col apoyu de 7 conceyales (los 4 d’IPÑ, los 2 de Conceyu Abiertu y el de Foro) por 4 en contra, con 2 astenciones.

Na semeya, un momentu del Plenu d'ayeri.

Contador Estadistiques