Noemí Martín reconoz nel Debate d’Orientación Política que queda “muncho por facer”

La ponencia de la portavoz d'Izquierda Xunida nel Debate d'Orientación Política d'Asturies centróse n'aspectos económicos y sociales. Sobre política llingüística, Martín reconoció que se va con retrasu, y reclamó la oficialidá na reforma del estatutu

Noemí Martín aseló'l trunfalismu de los socios de gobiernu a la hora de tratar los temes clave del Debate na ponencia d'apertura d'Izquierda Xunida- bloque por Asturies nel Debate d'Orientación Política de la Xunta Xeneral del Principáu, una ponencia que la diputada centró n'esponer la llista de sectores productivos del país que pasen per crisis y na evaluación de fallos que ve que se lleven cometíos nesti añu, anque lo mesmo que na ponencia d'Álvarez Areces, Noemí Martín faló d'un periodu ilusionante tres de les elecciones del 14 de marzu. Nesti contestu, la portavoz d'IX emponderó la "estabilidá social y institucional" consiguida nesti primer añu llargu de gobiernu al mesmu tiempu que reclamó un "xiru social" p'atender la realidá llaboral d'Asturies.

La portavoz d'IX articuló la so intervención en trés bloques rellacionaos col pautu de gobiernu: desarrollu sostenible, apueste por un modelu solidariu y afondamientu nel autogobiernu y la democracia. Nesti sentíu, l'alcuerdu de concertación social firmáu colos sindicatos y patronales llevó un bon cachu de la intervención, espresando la portavoz d'IX como los oxetivos d'esti alcuerdu se ven comprometíos cola situación actual del astilleru d'IZAR, los despidos na filial d'Amena o la situación de Coto Narcea como punta del iceberg de la minería sector pal que la diputada pidió un Plan de más p'allá del 2010 . De les industries Noemí Martín pasó a evaluar la situación del mercáu llaboral, del que la diputada dixo que presenta una tasa de temporalidá del 28,5%, una tasa inferior a la media estatal pero que Martín dixo que "nun nos tien de consolar", reclamando midíes contra la deslocalización y al favor de la estabilidá del emplegu, que la diputada pidió que se llevaren tamién al funcionariáu autonómicu.

El campu, otru sector clave pa la coalición d'izquierdes, ocupó un bon cachu de la intervención, reclamando Noemí Martín que se torgue la perda de cuota llechera y que se cumplan oxetivos marcaos nel Pautu de Gobiernu como ye la creación d'un plan d'Agricultura Ecolóxica y la Llei d'Agricultura y Desarrollu Rural.

Na cuestión de les infraestructures, Noemí Martín nun faló de plazos nin preferencies nin tampoco cuestionó nenguna de les obres que quier sacar alantre l'executivu, pidiendo qu'estes se construyan acordies cola llexislación mediuambiental.

L'exe de debate "desarrollu integral de les persones" foi otru de los puntos fuertes del discursu d'IX-BA, que se marcó l'oxetivu d qu'Asturies dexe la "condición de probe" del estáu del bienestar, cifrando bona parte de la superación d'esi status na aprebación "d'equí en pocos meses" de la Llei del Salariu Social, otru de los oxetivos ensin concretar del Pautu de Gobiernu. Dientro d'esti exe de debate, Noemí Martín emponderó la política de vivienda que se ta faciendo que "garantiza'l poner más de 15.000 viviendes protexíes en mercáu" una midida que favorez sobremanera a la "xente mozo que va acceder a una vivienda a precios asequibles".

La política llingüística tamién tuvo sitiu nel discursu de Noemí Martín, que llamentó los "motivos alministrativos" que retrasaron el qu'echare a andar la Oficina de Política Llingüística, pero valoró positivamente'l conxuntu de llogros de la llinia que se siguió y ente los que citó la ellaboración del Plan de Normalización, el trabayu de la Xunta de Toponimia, los alcuerdos de collaboración técnica colos conceyos, el desarrollu de la Llei d'Usu y la presencia efectiva del asturianu en tolos niveles educativos, pasos toos ellos que "van afalar un saltu cualitativu nesta materia".

El desarrollu del estáu de les autonomíes ocupó'l bloque col que finó la ponencia d'IX, que punxo delles condiciones básiques nel debate, como son el que se garantice un modelu d'estáu con igualdá de derechos políticos, competenciales, llingüísticos y financieros, con especial atención a la financiación de la sanidá. No tocante a la reforma estatutaria, Noemí Martín punxo como "exes básicos" pa Izquierda Xunida-Bloque por Asturies trés: l'ampliación de competencies, capacidá dafechu de disolución de la cámara autonómica y la oficialidá de la llingua asturiana.