Noemí Martín señala que la reforma verdadera que necesita l’Estáu ye “fiscal y financiera”

La diputada d’IX-LV, Noemí Martín, señala que la reforma que necesita l’Estáu ye “fiscal y financiera”. Tamién recuerda que Rubalcaba perdona a los ricos “700 millones añales” cola so propuesta de recuperación de l’Impuestu sobre'l Patrimoniu.
 
“Por desgracia, el balance del Gobiernu socialista ye que les reformes úniques qu’adoptó son el ‘pensionazu’, la reforma llaboral o la reforma constitucional reciente. Toes elles suponen un retrocesu en derechos sociales”, denuncia Martín, qu’entiende que la única reforma que ye necesaria ye la “fiscal y financiera”. D’igual forma, la diputada d’Izquierda Xunida (IX)-Los Verdes d’Asturies (LV) llamenta que’l PSOE namái fale de xubir impuestos a los ricos “cuando les eleiciones tán cerca”.
 
Al respeuto, la ex conseyera de Bienestar Social y Vivienda critica que’l candidatu socialista a la presidencia del Gobiernu estatal, Alfredo Pérez Rubalcaba, “perdona 700 millones añales a los patrimonios grandes frente al Impuestu sobre Patrimoniu vixente nel 2007”, añu nel que’l PSOE retirólu. “En namás cuatro años, regalaron a los grandes patrimonios más de 8.500 millones de euros”, una cantidá superior a lo que cuesta la Dependencia en cinco años”, asegura.
 
“Ye necesario recordar qu’esti impuestu namái lu pagaba’l 2 por cientu” del Estáu, continúa la diputada, que señala que “la rebaxa del PSOE nun afeuta a la clase media, salvo qu’agora consideren qu’esti sector tien dimensiones marxinales n’España”. “La última recaudación foi de dalgo más de 2.100 millones y el candidatu del PSOE diz que recaudará 1.500”, añadió. Por ello, incide en que “tovía ta na nuesa memoria colectiva la frase de Zapatero: baxar los impuestos ye d’izquierdes”. “Esa política de rebaxes fiscales pa ricos foi dramática pa la mayoría. Supunxo vaciar la despensa del Estáu y renunciar a unos recursos qu’agora sedríen esenciales pa financiar beques y hospitales”, argumenta Martín.
 
Nesi sen, apunta que “nos años últimos, el tipu efeutivu del IRPF que paguen les rentes más altes redúxose más de 18 puntos, les grandes empresas coticen un 10 por cientu menos polos sos beneficios y les fortunes grandes beneficiénse d’un paraísu fiscal llegalizáu que son les SICAV”. “Los únicos impuestos que xuben son los que pagamos toos, al marxe de los nuesos ingresos, comol’IVA”, llamenta.