Nin un pasu atrás contra les violencies machistes

|
Manifestación 25-P n'Uviéu

El movimientu feminista asturianu tornó a sacar músculu esti 25 de payares, Día Internacional de Desaniciu de la Violencia contra la Muyer, con una importante asistencia na manifestación d’Uviéu col lema 'Poles nueses vides. Xuntes y a la ofensiva' magar l'agua y el fríu. “Les muyeres nun vamos dar un pasu atrás nes nueses reivindicaciones pa desaniciar estes violencies que sufrimos”, anunciaron.

Ayeri foi una xornada de reivindicación tiñida de malva en tol país. Fontes, edificios, comercios…, vistiéronse con esti color tan simbólicu pa señalar el grave problema de les violencies machistes y concienciar a la sociedá sobre’l mesmu.

Tamién predominó nes munches concentraciones entamaes y na manifestación convocada pela tarde n’Uviéu magar les torgues puestes pol equipu de gobiernu municipal de PP y Ciudadanos. Con salida de la Estación del Norte y final nel Paséu los Álamos, la marcha recibió l’acompañamientu del agua metanes la cai Uría, lo que nun afeutó a la convocatoria nin nos cánticos de les manifestantes.

“Nun ta lloviendo, Canteli ta llorando” o “la cai Uría tamién ye mía” foron dalgunos de los improvisaos que se sumaron a los yá tradicionales d’estes convocatories. Al final del trayeutu lleóse’l manifiestu de la xornada, n’asturianu la primer metá del mesmu: “Güei, como’l restu l’añu, denunciamos que millones de muyeres en tol mundu siguen siendo víctimes de la violencia machista namái pol fechu de ser muyeres”, esclamaron.

“La violencia contra les muyeres ye una de les más degradantes violaciones de los derechos humanos, y polos tipos de manifestaciones y el númberu de muyeres asesinaes en tol mundu, ha ser considerada una cuestión d’estáu y ascendida al reconocimientu de terrorismu machista”, apuntaron depués de cifrar en 1.245 les muyeres asesinaes por homes nel Estáu dende’l 2010. Darréu denunciaron tamién otros tipos de violencies machistes, “como son la violencia psicolóxica que nos destrúi l’autoestima y la salú; asina como la violencia llaboral, económica y patrimonial que nos emprobrez y esplota”, dando nesti momentu un aplausu a “les compañeres en llucha del Serviciu d’ayuda a domiciliu”, amás de la “simbólica y institucional que nos revictimiza y nos criminaliza”, citando l’exemplu de Juana Rivas, la vicaria y la psicolóxica.

Les situaciones que viven les muyeres lesbianes, bisexuales y transexuales, asina como les migrantes, foron d’igual forma recordaes nel manifiestu. Tamién hebo pallabres pa reclamar el control reproductivu “de los nuesos cuerpos” y la fin y prevención les violaciones grupales, asina como pa denunciar “la esplotación sexual, les violencies y agresiones sexuales que viven munches muyeres, moces y neñes nel mundu”, citando’l casu de Noe, la rapaza víctima d’un cruel ataque n’Igualada que cuasi acaba cola so vida.

“Les muyeres nun vamos dar un pasu atrás nes nueses reivindicaciones pa desaniciar estes violencies que sufrimos les muyeres. ¡Valió! ¡Vives nos queremos!”, terminó la llectura. “Les violencies machistes siguen siendo un problema de primer orde. Necesítense respuestes estructurales pa poder desaniciales, respuestes estructurales pa garantizar condiciones de vida dignes pa toles muyeres”, declaró al final del actu Melissa Ciccheti, vocera d’Asturies Feminista 8M, coleutivu convocante.

Semeya obra de Jorge Fernández.

Contador Estadistiques