Nicanor García Fernández abandona "avergonzáu" la militancia en Ciudadanos

|
Nicanor García Fernández puestín Iniciativa pol Asturianu na FIDMA

El voceru de la formación naranxa na llexislatura anterior, indignáu polo que ta asocediendo nel grupu parllamentariu na Xunta Xeneral y l'actitú de la direición.

Dos díes depués de la espulsión de Luis Armando Fernández Bartolomé de Ciudadanos por "indisciplina y infraiciones graves", Nicanor García Fernández comunicó la so decisión d'abandonar la militancia. Meses enantes, en xineru, la otra diputada crítica, Laura Pérez Macho dexaba'l so escañu llueu de quedar apartada de la negociación presupuestaria por, al igual que'l so compañeru, amosar la so disconformidá pol proceder de la direición del partíu y de la vocera actual, Susana Fernández Álvarez.

El de Nembra dixo tar "avergonzáu polo que ta asocediendo nel grupu parllamentariu" y señaló al coordinador Ignacio Cuesta y al secretariu d'Organización y diputáu, Sergio García, de prauticar una política d'enfrentamientu. A diferencia de los representantes actuales de Ciudadanos na Xunta Xeneral, con una postura agresiva en tou momentu contra l'asturianu, García Fernández adoptó siempre una posición de respetu al idioma y de defensa del cumplimientu de la Llei d'Usu y Promoción del Bable/Asturianu, con presencia en numberosos actos institucionales, como'l Día de les Lletres Asturianes o la gala d'entrega de los Premios Lliterarios.

Na semeya, García Fernández nuna visita al puestín d'Iniciativa pol Asturianu na Feria Internacional de Muestres d'Asturies (FIDMA) del añu 2017.

Contador Estadistiques