“Nestes eleiciones nun se pue dispersar el votu; hai que dir xuntos pa llograr la reforma del Estatutu”, afirma Elipe

Esti martes presentóse na uvieína Escandalera la candidatura Somos Asturies pa les primaries de Podemos que lidera Covadonga Tomé y que cuenta con Xune Elipe como independiente nel númberu 2. “Nestes eleiciones nun se pue dispersar el votu; hai que dir xuntos pa llograr la reforma del Estatutu”, apuntó’l cantante de Dixebra.

“Pensaron en min cuando la xente d’esta candidatura decidió dar el pasu de presentase porque creo que puedo representar un perfil de consensu ente les distintes formes de ver la organización, y non sólo la organización, sinón de la manera de facer política n’Asturies”, señaló’l de Villalegre, qu’añadió que “cuando fui conceyal n’Avilés siempre tuvi una llinia bastante independiente. La xente que conforma la candidatura de Somos Asturies aceptó que siguiera manteniendo esi tipu de perfil independiente. Yo nun voi entrar n’engarradielles interes, mantúveme al marxe d’elles yá nes anteriores, amás porque conozo a xente como a Rafa (Palacios) o como Sofía (Fernández Castañón), téngo-yos respetu y apreciu, y nun voi entrar en nengún tipu d’engarradiella. Ye una de les condiciones”.

Sobre los sos compañeros de candidatura rescampló que “son xente que lleva trabayando años, nos que yo yá collaboré con ellos mano a mano nos tiempos de La Madreña, qu’echaron alantre un proyeutu que llegó a tener 9 diputaos y llegó a aglutinar a un sector mui importante de la sociedá asturiana y creo qu’esa xente sigue siendo válido pa poder conformar esi espaciu políticu asturianu autónomu que queremos”. Un compromisu que lu llevó a incorporase al proyeutu de Somos Asturies, “que recupera non sólo’l nome, sinón l’espíritu: el facer una organización abierta y plural nel que tol mundu que quiera pueda venir a facer política llibremente”.

Elipe tamién quixo analizar lo que pue aportar nestos momentos a la organización, recordando que “la próxima llexislatura, si se dan los númberos suficientes, va ser na que vuelva a abrise la oportunidá de reformar l’Estatutu d’Autonomía, y ye importante axuntar les fuercies de toes eses persones que venimos de la cultura asturianista”.

Asina añadió “qu’hai un magma alredor d’esi conceptu del asturianismu que llogró la llexislatura pasada axuntar a miles de persones, sobre 25.000, desixendo la oficialidá de la llingua asturiana. Esi magma tien que ser consciente de que nestes eleiciones nun se pue dispersar el votu, qu’hai que dir xuntos pa llograr non sólo esi oxetivu. La idea nuestra ye que la reforma del Estatutu d’Autonomía ye inaplazable, ye un testu obsoletu, qu’hai qu’adecuar a les necesidaes de la sociedá asturiana del sieglu XXI, y que non sólo va valir p’asegurar los derechos llingüísticos de los asturianofalantes y los gallego-asturianofalantes, sinón que tamién va valir pa tresformar la vida de les persones. Al traviés d’esa máxima norma llegar, que ye pola que nos reximos, podemos llograr que l’autogobiernu se ponga al serviciu de les persones, y de los intereses de les clases trabayadores y populares asturianes”.

Recuperar la ilusión

Pela so parte, Tomé señaló “que’l motivu fundamental de presentar esta candidatura ye recuperar esa ilusión que nel so momentu representó’l nacimientu de Podemos n’Asturies y en toa España. Ye imprescindible nesti momentu políticu la capacidá d’apertura, d’intergración, de texer alliances, de recuperar la participación de la sociedá civil. Toes estes coses son fundamentales pa tener una alternativa política a lo que conocemos n’actualidá y a lo que tamos viviendo nos años últimos”.

Apuntó la valdesana que “dende les primaries d’avientu la sensación ye que Podemos Asturies perdió esa ilusión, esa forma d’actuar, d’entender la política, y precisamente por eso presentamos una candidatura alternativa a la que será la candidatura oficial”.

Na semeya, Andrés Ron, que forma parte tamién de la candidatura, Tomé, Elipe y el diputáu y ex coordinador autonómicu Daniel Ripa.