Nengún casu n’Asturies de trombosis venosa cerebral con 10.063 dosis puestes d’AstraZeneca

Asturies suspendió temporalmente l’alministración de la vacuna d’AstraZeneca tres l’alcuerdu del Conseyu Interterritorial del Sistema Nacional de Salud urxente del llunes al detectese casos inusuales de trombosis venosa cerebral tres la so puesta. 10.063 asturianos recibieron yá primeres dosis del preparáu ensin reaiciones d’esti tipu.

Foron dellos los países europeos que tomaron esta mesma decisión la selmana pasada tres la detección d’eventos trombóticos en persones que recibieren esta vacuna. En tol Estáu, con 939.534 alministraes, diose un casu.

El parón na alministración del preparáu d’AstraZeneca va allargase hasta que’l Comité de Farmacovixilancia de l’Axencia Europea del Medicamentu estudie esta situación y garantice la so seguridá. “Anque son mui pocos casos n’Europa, son mui significativos”, apuntó ayeri tres la xunta’l conseyeru de Salú, Pablo Ignacio Fernández Muñiz.

5,84 por cientu de la población inmunizada

Mentanto, Asturies, que recibió 36.600 dosis d'AstraZeneca, de les que punxo 10.063, va siguir suministrando les otres dos vacunes, la de Pfizer/BioNtech y la de Moderna. De la primera yá s’emplegaron 147.470 dosis, con 56.029 cola pauta completa, y de la segunda, 10.490, con 3.570 persones coles dos que marca’l protocolu, lo que permite que’l 5,84 por cientu población tea yá inmunizao.