Nel occidente asturianu entámenla esti fin de selmana

Pousada de Rengos y Tormaleo tienen bonos reclamos pa esti fin de
selmana, mercaos tradicionales y música son el cebu.



En Tormaleo, conceyu d'Ibias, entamen una noite folk, nueche bien llarga
y curiosa qu'entama de día a les 10:00 de la mañana con un
pasucais. Dempués d'esti arranque musical, a les 11:00 yá
podremos visitar el Mercáu Tradicional de l'asociación
"Miravalles". D'ehí en p'alantre nun va parar l'animación en
tol día. A les 17:00 va actuar el grupu de baille "Xuno" y la
banda de gaites "Polavila", y pa que nun falten fuerces por culpa la
fame, a les 19:00 va haber una espicha popular. Lo que ye talamente la noite folk
entama a les 23:00 hores, y nella van actuar cuatro grupos, los ayeranos
"Tarañu" que tan acabantes de sacar el so primer discu a la
cai, "Los Ciquitrinos", "Corquiéu" y pa pesllar la
noite'l grupu local de hard-rock "Orion".



Si preferimos dir pal conceyu de Cangas del Narcea entós podemos
alleganos hasta Pousada de Rengos onde tamién hai un cartel d'actividaes
preparáu. Ellí va haber dende'l sábadu de tarde'l IV
Mercáu Tradicional de Pousada de Rengos, qu'intenta ser una
reproducción lo más fiel posible de los mercaos antiguos de la
zona. Ello ye que l'asociación "Agua Blanca", organizadora del
mercáu, tien preparaes actuaciones musicales, teatru infantil, muestres
de caballos y carros del país y llarga riestra de propuestes
típiques de los mercaos tradicionales. La nota musical va ponela
"La Bandina" que va actuar el sábadu de nueche a eso de les
once de la nueche, y los bailles van ponelos el grupu de baille de Xixón
"La Señardá". El domingu va siguir el mercáu con
bien d'actividaes, "La Señardá", bandines y les
actuaciones de los grupos de teatru "Nun Tris" y
"Margen".