‘Nel mio conceyu, na mio llingua’, nome de la campaña pa reclamar a los ayuntamientos al traviés d'escritos l’usu del idioma

|
Campaña 'Nel mio conceyu, na mio llingua' XDLA y Xeira

La Xunta pola Defensa de la Llingua Asturiana (XDLA) y Xeira dieron a conocer los detalles de la so campaña nueva, de nome ‘Nel mio conceyu, na mio llingua’, que busca dar ferramientes a los vecinos pa reclamar l’usu del idioma polos ayuntamiento. Nel Eo-Navia ésta va desendolcase como 'Nel meu conceyo, na mía llingua'.

La traducción de la páxina web, la señalización d’edificios y dependencies, la oficialización de la toponimia tradicional o, nel so casu, la xeneralización del usu d'esa toponimia y l'usu de la llingua propia nes intervenciones públiques de l’alcaldía y les conceyalíes, amás de na cartelería y difusión de campañes y actividaes, son les midíes que se quieren reclamar naquellos conceyos que nun dieron entá estos pasos. “Nestos momentos cuasi puen contase colos deos d'una mano les páxines d'entidaes públiques que cuenten cola opción de poder navegar n'asturianu o en gallego-asturiano, un fechu que consideramos una falta de respetu hacia'l patrimoniu llingüísticu d'esta tierra y hacia los sos falantes. Lo mesmo pasa cola toponimia oficial o na visibilidá de les llingües propies en campañes y nel día a día de l'Alministración local”, espliquen dambes organizaciones.

Pa facilitar esti pasu a los vecinos yá ye posible descargar na web de la XDLA y na páxina de Facebook de Xeira’l modelu de solicitú con versión n'asturianu y en gallego-asturiano col oxetivu de que los interesaos reclamen al so ayuntamientu, al traviés del corréu electrónicu o vía Rexistru Municipal, l'usu d'estes llingües y un compromisu y implicación mayor con eesta cuestión. “Los conceyos son les alministraciones más allegaes a la ciudadanía y por eso puen cumplir un papel fundamental na defensa, recuperación y normalización de les llingües minorizaes”, aseguren.

Otra manera, coles etiquetes #NaMioLlingua y #NaMiaLlingua llamen a la ciudadanía a que reclamen al traviés de redes sociales l'usu de los idiomes propios d'Asturies.

Contador Estadistiques