Nel Día de les Lletres, manifestación

Güei, como tolos años nel Día de les Lletres
Asturianes, la Xunta Pola Defensa de la Llingua Asturiana entama una
manifestación, anguaño ye n'Avilés a les 19:00 hores.



Col llema L'asturianu llingua oficial, un derechu irrenunciable",
la manifestación va salir a eso de les 19:00 dende la estación
intermodal d'Avilés, pa dir acabar na Casa Cultura d'Avilés. La
Xunta entama otru añu más esta
manifestación
dempués d'un añu movío pa la llingua asturiana, que
dempués de les elecciones n'Asturies y los posteriores pactos de
gobiernu podía apaecer dalguna posibilidá de ver la esperada
oficialidá. Col pasu del tiempu la
Xunta considera que la mayoría de les espectatives nun se
cumplieron, y a lo llargo d'esti añu foi mui crítica col gobiernu
asturianu no qu'a política llingüística cinca. D'esta forma,
la Xunta vese otru añu más entamando una manifestación
pola Oficialidá del Asturianu nel
Día
de les Lletres Asturianes.



Dempués de la manifestación na Casa Cultura
d'Avilés va facése la tradicional Xunta Estraodinaria del
día de les lletres de
l'Academia
de la Llingua Asturiana. Na Xunta Estraordinaria -na que la Presidenta,
Dña. Ana Mª Cano González, va lleer el discursu
institucional- va tomar posesión como académicu correspondiente'l
doctor D. José Antonio Fernández Vior. La sesión de la
Xunta Estraodinaria va finar cola actuación del grupu de Ribesella
"Corquiéu".
Dempués d'esti actu ta entamada de mano de la Xunta Pola Defensa de la
Llingua una espicha que tien un preciu bien baratu de 10 euros.