Neños y mayores van esfrutar el sábadu en L’Entregu de la II Xuntanza Malabar

Tres l’ésitu del añu pasáu, la Xuntanza Malabar torna a celebrase en L’Entregu pa disfrute de neños y mayores. A lo llargo del sábadu, el parque La Llaguna va acoyer una bona riestra d’actividaes venceyaes a actividaes circenses.
 
La compañía El Neñu los Coríos y Circo en la Luna entamen esti eventu nel que collabora’l Conceyu de Samartín del Rei Aurelio y dellos coleutivos. L’actividá va principiar a les 10.30 hores cola celebración de dellos talleres abiertos, asina como otros de construcción de pelotes y de ‘maces’ (de 11 a 12.30 hores), a cargu del Centru Social Autoxestionáu La Semiente y de l’Asociación Juvenil Esperteyu de La Pola Siero, de manera respeutiva. A les 13.30 hores, los gallegos Isla Letriska van presentar l’espectáculu ‘Le triska inmóbile’, pa depués dar pasu a la sesión vermú coles bandes Delagua y Perro Blanco Blues y celebrar una xinta popular.
 
Pela tarde ta previsto un tornéu de ‘voley-maza’ a les 16 hores y, una hora más tarde, la Olimpiada Malabar, presentada polos llocales Circo en la Luna y los sierenses Medrando. A les 19 hores, los uviedinos Teatroncho van ufrir la ‘Gran Gala Caleyera del Circu’, pa zarrar la xornada cola actividá más esperada y espectacular: la Nueche de Fueu y Percusión, na que participen la Batucada Matu na Cai y la Batucada Asociación Rei Aurelio. El so entamu ta previsto pa les 21 hores. Hai que destacar que nel casu de que’l tiempu nun acompañe, la II Xuntanza Malabar va treslladase al polideportivu del Colexu Públicu El Bosquín, polo que la lluvia nun pue ser torga p’averase a L’Entregu esti sábadu.